Pro 11:1 א  מאזני מרמה תועבת יהוה    ואבן שלמה רצונו
Pro 11:2 ב  בא-זדון ויבא קלון    ואת-צנועים חכמה
Pro 11:3 ג  תמת ישרים תנחם    וסלף בגדים ושדם (ישדם)
Pro 11:4 ד  לא-יועיל הון ביום עברה    וצדקה תציל ממות
Pro 11:5 ה  צדקת תמים תישר דרכו    וברשעתו יפל רשע
Pro 11:6 ו  צדקת ישרים תצילם    ובהות בגדים ילכדו
Pro 11:7 ז  במות אדם רשע תאבד תקוה    ותוחלת אונים אבדה
Pro 11:8 ח  צדיק מצרה נחלץ    ויבא רשע תחתיו
Pro 11:9 ט  בפה--חנף ישחת רעהו    ובדעת צדיקים יחלצו
Pro 11:10 י  בטוב צדיקים תעלץ קריה    ובאבד רשעים רנה
Pro 11:11 יא  בברכת ישרים תרום קרת    ובפי רשעים תהרס
Pro 11:12 יב  בז-לרעהו חסר-לב    ואיש תבונות יחריש
Pro 11:13 יג  הולך רכיל מגלה-סוד    ונאמן-רוח מכסה דבר
Pro 11:14 יד  באין תחבלות יפל-עם    ותשועה ברב יועץ
Pro 11:15 טו  רע-ירוע כי-ערב זר    ושנא תקעים בוטח
Pro 11:16 טז  אשת-חן תתמך כבוד    ועריצים יתמכו-עשר
Pro 11:17 יז  גמל נפשו איש חסד    ועכר שארו אכזרי
Pro 11:18 יח  רשע--עשה פעלת-שקר    וזרע צדקה שכר אמת
Pro 11:19 יט  כן-צדקה לחיים    ומרדף רעה למותו
Pro 11:20 כ  תועבת יהוה עקשי-לב    ורצונו תמימי דרך
Pro 11:21 כא  יד ליד לא-ינקה רע    וזרע צדיקים נמלט
Pro 11:22 כב  נזם זהב באף חזיר--    אשה יפה וסרת טעם
Pro 11:23 כג  תאות צדיקים אך-טוב    תקות רשעים עברה
Pro 11:24 כד  יש מפזר ונוסף עוד    וחשך מישר אך-למחסור
Pro 11:25 כה  נפש-ברכה תדשן    ומרוה גם-הוא יורא
Pro 11:26 כו  מנע בר יקבהו לאום    וברכה לראש משביר
Pro 11:27 כז  שחר טוב יבקש רצון    ודרש רעה תבואנו
Pro 11:28 כח  בוטח בעשרו הוא יפול    וכעלה צדיקים יפרחו
Pro 11:29 כט  עכר ביתו ינחל-רוח    ועבד אויל לחכם-לב
Pro 11:30 ל  פרי-צדיק עץ חיים    ולקח נפשות חכם
Pro 11:31 לא  הן צדיק בארץ ישלם    אף כי-רשע וחוטא