Allepo, Proverbs, Chapter 09

Pro 9:1 א  חכמות בנתה ביתה    חצבה עמודיה שבעה
Pro 9:2 ב  טבחה טבחה מסכה יינה    אף ערכה שלחנה
Pro 9:3 ג  שלחה נערתיה תקרא--    על-גפי מרמי קרת
Pro 9:4 ד  מי-פתי יסר הנה    חסר-לב אמרה לו
Pro 9:5 ה  לכו לחמו בלחמי    ושתו ביין מסכתי
Pro 9:6 ו  עזבו פתאים וחיו    ואשרו בדרך בינה
Pro 9:7 ז  יסר לץ--לקח לו קלון    ומוכיח לרשע מומו
Pro 9:8 ח  אל-תוכח לץ פן-ישנאך    הוכח לחכם ויאהבך
Pro 9:9 ט  תן לחכם ויחכם-עוד    הודע לצדיק ויוסף לקח
Pro 9:10 י  תחלת חכמה יראת יהוה    ודעת קדשים בינה
Pro 9:11 יא  כי-בי ירבו ימיך    ויוסיפו לך שנות חיים
Pro 9:12 יב  אם-חכמת חכמת לך    ולצת לבדך תשא
Pro 9:13 יג  אשת כסילות המיה    פתיות ובל-ידעה מה
Pro 9:14 יד  וישבה לפתח ביתה--    על-כסא מרמי קרת
Pro 9:15 טו  לקרא לעברי-דרך    המישרים ארחותם
Pro 9:16 טז  מי-פתי יסר הנה    וחסר-לב ואמרה לו
Pro 9:17 יז  מים-גנובים ימתקו    ולחם סתרים ינעם
Pro 9:18 יח  ולא-ידע כי-רפאים שם    בעמקי שאול קראיה