Pro 4:1 א  שמעו בנים מוסר אב    והקשיבו לדעת בינה
Pro 4:2 ב  כי לקח טוב נתתי לכם    תורתי אל-תעזבו
Pro 4:3 ג  כי-בן הייתי לאבי    רך ויחיד לפני אמי
Pro 4:4 ד  וירני--ויאמר לי יתמך-דברי לבך    שמר מצותי וחיה
Pro 4:5 ה  קנה חכמה קנה בינה    אל-תשכח ואל-תט מאמרי-פי
Pro 4:6 ו  אל-תעזבה ותשמרך    אהבה ותצרך
Pro 4:7 ז  ראשית חכמה קנה חכמה    ובכל-קנינך קנה בינה
Pro 4:8 ח  סלסלה ותרוממך    תכבדך כי תחבקנה
Pro 4:9 ט  תתן לראשך לוית-חן    עטרת תפארת תמגנך
Pro 4:10 י  שמע בני וקח אמרי    וירבו לך שנות חיים
Pro 4:11 יא  בדרך חכמה הריתיך    הדרכתיך במעגלי-ישר
Pro 4:12 יב  בלכתך לא-יצר צעדך    ואם-תרוץ לא תכשל
Pro 4:13 יג  החזק במוסר אל-תרף    נצרה כי-היא חייך
Pro 4:14 יד  בארח רשעים אל-תבא    ואל-תאשר בדרך רעים
Pro 4:15 טו  פרעהו אל-תעבר-בו    שטה מעליו ועבר
Pro 4:16 טז  כי לא ישנו אם-לא ירעו    ונגזלה שנתם אם-לא יכשולו (יכשילו)
Pro 4:17 יז  כי לחמו לחם רשע    ויין חמסים ישתו
Pro 4:18 יח  וארח צדיקים כאור נגה    הולך ואור עד-נכון היום
Pro 4:19 יט  דרך רשעים כאפלה    לא ידעו במה יכשלו
Pro 4:20 כ  בני לדברי הקשיבה    לאמרי הט-אזנך
Pro 4:21 כא  אל-יליזו מעיניך    שמרם בתוך לבבך
Pro 4:22 כב  כי-חיים הם למצאיהם    ולכל-בשרו מרפא
Pro 4:23 כג  מכל-משמר נצר לבך    כי-ממנו תוצאות חיים
Pro 4:24 כד  הסר ממך עקשות פה    ולזות שפתים הרחק ממך
Pro 4:25 כה  עיניך לנכח יביטו    ועפעפיך יישרו נגדך
Pro 4:26 כו  פלס מעגל רגלך    וכל-דרכיך יכנו
Pro 4:27 כז  אל-תט-ימין ושמאול    הסר רגלך מרע