Psa 143:1 א  מזמור לדוד יהוה שמע תפלתי--    האזינה אל-תחנוני באמנתך ענני    בצדקתך
Psa 143:2 ב  ואל-תבוא במשפט    את-עבדך כי לא-יצדק לפניך    כל-חי
Psa 143:3 ג  כי רדף אויב נפשי--    דכא לארץ חיתי הושבני במחשכים    כמתי עולם
Psa 143:4 ד  ותתעטף עלי רוחי    בתוכי ישתומם לבי
Psa 143:5 ה  זכרתי ימים מקדם--    הגיתי בכל-פעלך במעשה ידיך    אשוחח
Psa 143:6 ו  פרשתי ידי אליך    נפשי כארץ-עיפה לך סלה
Psa 143:7 ז  מהר ענני יהוה--    כלתה רוחי אל-תסתר פניך ממני    ונמשלתי עם-ירדי בור
Psa 143:8 ח  השמיעני בבקר חסדך--    כי-בך בטחתי הודיעני דרך-זו אלך--    כי-אליך נשאתי נפשי
Psa 143:9 ט  הצילני מאיבי יהוה--    אליך כסתי
Psa 143:10 י  למדני לעשות רצונך--    כי-אתה אלוהי רוחך טובה    תנחני בארץ מישור
Psa 143:11 יא  למען-שמך יהוה תחיני    בצדקתך תוציא מצרה נפשי
Psa 143:12 יב  ובחסדך תצמית איבי    והאבדת כל-צררי נפשי--כי אני עבדך