Allepo, Psalms, Chapter 135

Psa 135:1 א  הללו-יה הללו את-שם יהוה    הללו עבדי יהוה
Psa 135:2 ב  שעמדים בבית יהוה--    בחצרות בית אלהינו
Psa 135:3 ג  הללו-יה כי-טוב יהוה    זמרו לשמו כי נעים
Psa 135:4 ד  כי-יעקב בחר לו יה    ישראל לסגלתו
Psa 135:5 ה  כי אני ידעתי כי-גדול יהוה    ואדנינו מכל-אלהים
Psa 135:6 ו  כל אשר-חפץ יהוה    עשה בשמים ובארץ--    בימים וכל-תהמות
Psa 135:7 ז  מעלה נשאים    מקצה הארץ ברקים למטר עשה    מוצא-רוח מאוצרותיו
Psa 135:8 ח  שהכה בכורי מצרים--    מאדם עד-בהמה
Psa 135:9 ט  שלח אותת ומפתים--בתוככי מצרים    בפרעה ובכל-עבדיו
Psa 135:10 י  שהכה גוים רבים    והרג מלכים עצומים
Psa 135:11 יא  לסיחון מלך האמרי ולעוג מלך הבשן    ולכל ממלכות כנען
Psa 135:12 יב  ונתן ארצם נחלה--    נחלה לישראל עמו
Psa 135:13 יג  יהוה שמך לעולם    יהוה זכרך לדר-ודר
Psa 135:14 יד  כי-ידין יהוה עמו    ועל-עבדיו יתנחם
Psa 135:15 טו  עצבי הגוים כסף וזהב    מעשה ידי אדם
Psa 135:16 טז  פה-להם ולא ידברו    עינים להם ולא יראו
Psa 135:17 יז  אזנים להם ולא יאזינו    אף אין-יש-רוח בפיהם
Psa 135:18 יח  כמוהם יהיו עשיהם--    כל אשר-בטח בהם
Psa 135:19 יט  בית ישראל ברכו את-יהוה    בית אהרן ברכו את-יהוה
Psa 135:20 כ  בית הלוי ברכו את-יהוה    יראי יהוה ברכו את-יהוה
Psa 135:21 כא  ברוך יהוה מציון--    שכן ירושלם הללו-יה