Allepo, Psalms, Chapter 116

Psa 116:1 א  אהבתי כי-ישמע יהוה--    את-קולי תחנוני
Psa 116:2 ב  כי-הטה אזנו לי    ובימי אקרא
Psa 116:3 ג  אפפוני חבלי-מות--ומצרי שאול מצאוני    צרה ויגון אמצא
Psa 116:4 ד  ובשם-יהוה אקרא    אנה יהוה מלטה נפשי
Psa 116:5 ה  חנון יהוה וצדיק    ואלהינו מרחם
Psa 116:6 ו  שמר פתאים יהוה    דלתי ולי יהושיע
Psa 116:7 ז  שובי נפשי למנוחיכי    כי-יהוה גמל עליכי
Psa 116:8 ח  כי חלצת נפשי ממות    את-עיני מן-דמעה את-רגלי מדחי
Psa 116:9 ט  אתהלך לפני יהוה--    בארצות החיים
Psa 116:10 י  האמנתי כי אדבר    אני עניתי מאד
Psa 116:11 יא  אני אמרתי בחפזי    כל-האדם כזב
Psa 116:12 יב  מה-אשיב ליהוה--    כל-תגמולוהי עלי
Psa 116:13 יג  כוס-ישועות אשא    ובשם יהוה אקרא
Psa 116:14 יד  נדרי ליהוה אשלם    נגדה-נא לכל-עמו
Psa 116:15 טו  יקר בעיני יהוה--    המותה לחסידיו
Psa 116:16 טז  אנה יהוה    כי-אני עבדך אני-עבדך בן-אמתך    פתחת למוסרי
Psa 116:17 יז  לך-אזבח זבח תודה    ובשם יהוה אקרא
Psa 116:18 יח  נדרי ליהוה אשלם    נגדה-נא לכל-עמו
Psa 116:19 יט  בחצרות בית יהוה--    בתוככי ירושלם הללו-יה