Psa 112:1 א  הללו-יה אשרי-איש ירא את-יהוה    במצותיו חפץ מאד
Psa 112:2 ב  גבור בארץ יהיה זרעו    דור ישרים יברך
Psa 112:3 ג  הון-ועשר בביתו    וצדקתו עמדת לעד
Psa 112:4 ד  זרח בחשך אור לישרים    חנון ורחום וצדיק
Psa 112:5 ה  טוב-איש חונן ומלוה    יכלכל דבריו במשפט
Psa 112:6 ו  כי-לעולם לא-ימוט    לזכר עולם יהיה צדיק
Psa 112:7 ז  משמועה רעה לא יירא    נכון לבו בטח ביהוה
Psa 112:8 ח  סמוך לבו לא יירא    עד אשר-יראה בצריו
Psa 112:9 ט  פזר נתן לאביונים--    צדקתו עמדת לעד קרנו    תרום בכבוד
Psa 112:10 י  רשע יראה וכעס--    שניו יחרק ונמס תאות רשעים    תאבד