Psa 105:1 א  הודו ליהוה קראו בשמו    הודיעו בעמים עלילותיו
Psa 105:2 ב  שירו-לו זמרו-לו    שיחו בכל-נפלאותיו
Psa 105:3 ג  התהללו בשם קדשו    ישמח לב מבקשי יהוה
Psa 105:4 ד  דרשו יהוה ועזו    בקשו פניו תמיד
Psa 105:5 ה  זכרו--נפלאותיו אשר-עשה    מפתיו ומשפטי-פיו
Psa 105:6 ו  זרע אברהם עבדו    בני יעקב בחיריו
Psa 105:7 ז  הוא יהוה אלהינו    בכל-הארץ משפטיו
Psa 105:8 ח  זכר לעולם בריתו    דבר צוה לאלף דור
Psa 105:9 ט  אשר כרת את-אברהם    ושבועתו לישחק
Psa 105:10 י  ויעמידה ליעקב לחק    לישראל ברית עולם
Psa 105:11 יא  לאמר--לך אתן את-ארץ-כנען    חבל נחלתכם
Psa 105:12 יב  בהיותם מתי מספר    כמעט וגרים בה
Psa 105:13 יג  ויתהלכו מגוי אל-גוי    מממלכה אל-עם אחר
Psa 105:14 יד  לא-הניח אדם לעשקם    ויוכח עליהם מלכים
Psa 105:15 טו  אל-תגעו במשיחי    ולנביאי אל-תרעו
Psa 105:16 טז  ויקרא רעב על-הארץ    כל-מטה-לחם שבר
Psa 105:17 יז  שלח לפניהם איש    לעבד נמכר יוסף
Psa 105:18 יח  ענו בכבל רגליו (רגלו)    ברזל באה נפשו
Psa 105:19 יט  עד-עת בא-דברו--    אמרת יהוה צרפתהו
Psa 105:20 כ  שלח מלך ויתירהו    משל עמים ויפתחהו
Psa 105:21 כא  שמו אדון לביתו    ומשל בכל-קנינו
Psa 105:22 כב  לאסר שריו בנפשו    וזקניו יחכם
Psa 105:23 כג  ויבא ישראל מצרים    ויעקב גר בארץ-חם
Psa 105:24 כד  ויפר את-עמו מאד    ויעצמהו מצריו
Psa 105:25 כה  הפך לבם לשנא עמו    להתנכל בעבדיו
Psa 105:26 כו  שלח משה עבדו    אהרן אשר בחר-בו
Psa 105:27 כז  שמו-בם דברי אתותיו    ומפתים בארץ חם
Psa 105:28 כח  שלח חשך ויחשך    ולא-מרו את-דבריו (דברו)
Psa 105:29 כט  הפך את-מימיהם לדם    וימת את-דגתם
Psa 105:30 ל  שרץ ארצם צפרדעים    בחדרי מלכיהם
Psa 105:31 לא  אמר ויבא ערב    כנים בכל-גבולם
Psa 105:32 לב  נתן גשמיהם ברד    אש להבות בארצם
Psa 105:33 לג  ויך גפנם ותאנתם    וישבר עץ גבולם
Psa 105:34 לד  אמר ויבא ארבה    וילק ואין מספר
Psa 105:35 לה  ויאכל כל-עשב בארצם    ויאכל פרי אדמתם
Psa 105:36 לו  ויך כל-בכור בארצם    ראשית לכל-אונם
Psa 105:37 לז  ויוציאם בכסף וזהב    ואין בשבטיו כושל
Psa 105:38 לח  שמח מצרים בצאתם    כי-נפל פחדם עליהם
Psa 105:39 לט  פרש ענן למסך    ואש להאיר לילה
Psa 105:40 מ  שאל ויבא שלו    ולחם שמים ישביעם
Psa 105:41 מא  פתח צור ויזובו מים    הלכו בציות נהר
Psa 105:42 מב  כי-זכר את-דבר קדשו    את-אברהם עבדו
Psa 105:43 מג  ויוצא עמו בששון    ברנה את-בחיריו
Psa 105:44 מד  ויתן להם ארצות גוים    ועמל לאמים יירשו
Psa 105:45 מה  בעבור ישמרו חקיו--    ותורתיו ינצרו הללו-יה