Allepo, Psalms, Chapter 085

Psa 85:1 א  למנצח לבני-קרח מזמור
Psa 85:2 ב  רצית יהוה ארצך    שבת שבות (שבית) יעקב
Psa 85:3 ג  נשאת עון עמך    כסית כל-חטאתם סלה
Psa 85:4 ד  אספת כל-עברתך    השיבות מחרון אפך
Psa 85:5 ה  שובנו אלהי ישענו    והפר כעסך עמנו
Psa 85:6 ו  הלעולם תאנף-בנו    תמשך אפך לדר ודר
Psa 85:7 ז  הלא-אתה תשוב תחינו    ועמך ישמחו-בך
Psa 85:8 ח  הראנו יהוה חסדך    וישעך תתן-לנו
Psa 85:9 ט  אשמעה--    מה-ידבר האל יהוה כי ידבר שלום--אל-עמו ואל-חסידיו    ואל-ישובו לכסלה
Psa 85:10 י  אך קרוב ליראיו ישעו    לשכן כבוד בארצנו
Psa 85:11 יא  חסד-ואמת נפגשו    צדק ושלום נשקו
Psa 85:12 יב  אמת מארץ תצמח    וצדק משמים נשקף
Psa 85:13 יג  גם-יהוה יתן הטוב    וארצנו תתן יבולה [ (Psalms 85:14) יד  צדק לפניו יהלך    וישם לדרך פעמיו ]