Allepo, Psalms, Chapter 072

Psa 72:1 א  לשלמה    אלהים--משפטיך למלך תן וצדקתך לבן-מלך
Psa 72:2 ב  ידין עמך בצדק    וענייך במשפט
Psa 72:3 ג  ישאו הרים שלום לעם    וגבעות בצדקה
Psa 72:4 ד  ישפט עניי-עם--יושיע לבני אביון    וידכא עושק
Psa 72:5 ה  ייראוך עם-שמש    ולפני ירח דור דורים
Psa 72:6 ו  ירד כמטר על-גז    כרביבים זרזיף ארץ
Psa 72:7 ז  יפרח-בימיו צדיק    ורב שלום עד-בלי ירח
Psa 72:8 ח  וירד מים עד-ים    ומנהר עד-אפסי-ארץ
Psa 72:9 ט  לפניו יכרעו ציים    ואיביו עפר ילחכו
Psa 72:10 י  מלכי תרשיש ואיים    מנחה ישיבו מלכי שבא וסבא    אשכר יקריבו
Psa 72:11 יא  וישתחוו-לו כל-מלכים    כל-גוים יעבדוהו
Psa 72:12 יב  כי-יציל אביון משוע    ועני ואין-עזר לו
Psa 72:13 יג  יחס על-דל ואביון    ונפשות אביונים יושיע
Psa 72:14 יד  מתוך ומחמס יגאל נפשם    וייקר דמם בעיניו
Psa 72:15 טו  ויחי--    ויתן-לו מזהב שבא ויתפלל בעדו תמיד    כל-היום יברכנהו
Psa 72:16 טז  יהי פסת-בר בארץ--    בראש הרים ירעש כלבנון פריו    ויציצו מעיר כעשב הארץ
Psa 72:17 יז  יהי שמו לעולם--    לפני-שמש ינין (ינון) שמו ויתברכו בו    כל-גוים יאשרוהו
Psa 72:18 יח  ברוך יהוה אלהים--אלהי ישראל    עשה נפלאות לבדו
Psa 72:19 יט  וברוך שם כבודו--    לעולם וימלא כבודו את-כל הארץ--    אמן ואמן
Psa 72:20 כ  כלו תפלות--    דוד בן-ישי