Psa 69:1 א  למנצח על-שושנים לדוד
Psa 69:2 ב  הושיעני אלהים--    כי באו מים עד-נפש
Psa 69:3 ג  טבעתי ביון מצולה--    ואין מעמד באתי במעמקי-מים    ושבלת שטפתני
Psa 69:4 ד  יגעתי בקראי נחר גרוני    כלו עיני--מיחל לאלהי
Psa 69:5 ה  רבו משערות ראשי--    שנאי חנם עצמו מצמיתי איבי שקר--    אשר לא-גזלתי אז אשיב
Psa 69:6 ו  אלהים--אתה ידעת לאולתי    ואשמותי ממך לא-נכחדו
Psa 69:7 ז  אל-יבשו בי קויך--    אדני יהוה צבאות אל-יכלמו בי מבקשיך--    אלהי ישראל
Psa 69:8 ח  כי-עליך נשאתי חרפה    כסתה כלמה פני
Psa 69:9 ט  מוזר הייתי לאחי    ונכרי לבני אמי
Psa 69:10 י  כי-קנאת ביתך אכלתני    וחרפות חורפיך נפלו עלי
Psa 69:11 יא  ואבכה בצום נפשי    ותהי לחרפות לי
Psa 69:12 יב  ואתנה לבושי שק    ואהי להם למשל
Psa 69:13 יג  ישיחו בי ישבי שער    ונגינות שותי שכר
Psa 69:14 יד  ואני תפלתי-לך יהוה עת רצון--    אלהים ברב-חסדך ענני    באמת ישעך
Psa 69:15 טו  הצילני מטיט ואל-אטבעה    אנצלה משנאי וממעמקי מים
Psa 69:16 טז  אל-תשטפני שבלת מים--    ואל-תבלעני מצולה ואל-תאטר-עלי באר    פיה
Psa 69:17 יז  ענני יהוה כי-טוב חסדך    כרב רחמיך פנה אלי
Psa 69:18 יח  ואל-תסתר פניך מעבדך    כי-צר-לי מהר ענני
Psa 69:19 יט  קרבה אל-נפשי גאלה    למען איבי פדני
Psa 69:20 כ  אתה ידעת--חרפתי ובשתי וכלמתי    נגדך כל-צוררי
Psa 69:21 כא  חרפה שברה לבי--    ואנושה ואקוה לנוד ואין    ולמנחמים ולא מצאתי
Psa 69:22 כב  ויתנו בברותי ראש    ולצמאי ישקוני חמץ
Psa 69:23 כג  יהי-שלחנם לפניהם לפח    ולשלומים למוקש
Psa 69:24 כד  תחשכנה עיניהם מראות    ומתניהם תמיד המעד
Psa 69:25 כה  שפך-עליהם זעמך    וחרון אפך ישיגם
Psa 69:26 כו  תהי-טירתם נשמה    באהליהם אל-יהי ישב
Psa 69:27 כז  כי-אתה אשר-הכית רדפו    ואל-מכאוב חלליך יספרו
Psa 69:28 כח  תנה-עון על-עונם    ואל-יבאו בצדקתך
Psa 69:29 כט  ימחו מספר חיים    ועם צדיקים אל-יכתבו
Psa 69:30 ל  ואני עני וכואב    ישועתך אלהים תשגבני
Psa 69:31 לא  אהללה שם-אלהים בשיר    ואגדלנו בתודה
Psa 69:32 לב  ותיטב ליהוה משור פר    מקרן מפריס
Psa 69:33 לג  ראו ענוים ישמחו    דרשי אלהים ויחי לבבכם
Psa 69:34 לד  כי-שמע אל-אביונים יהוה    ואת-אסיריו לא בזה
Psa 69:35 לה  יהללוהו שמים וארץ    ימים וכל-רמש בם
Psa 69:36 לו  כי אלהים יושיע ציון ויבנה ערי יהודה    וישבו שם וירשוה [ (Psalms 69:37) לז  וזרע עבדיו ינחלוה    ואהבי שמו ישכנו-בה ]