Allepo, Psalms, Chapter 046

Psa 46:1 א  למנצח לבני-קרח--    על-עלמות שיר
Psa 46:2 ב  אלהים לנו מחסה ועז    עזרה בצרות נמצא מאד
Psa 46:3 ג  על-כן לא-נירא בהמיר ארץ    ובמוט הרים בלב ימים
Psa 46:4 ד  יהמו יחמרו מימיו    ירעשו הרים בגאותו סלה
Psa 46:5 ה  נהר--פלגיו ישמחו עיר-אלהים    קדש משכני עליון
Psa 46:6 ו  אלהים בקרבה בל-תמוט    יעזרה אלהים לפנות בקר
Psa 46:7 ז  המו גוים מטו ממלכות    נתן בקולו תמוג ארץ
Psa 46:8 ח  יהוה צבאות עמנו    משגב-לנו אלהי יעקב סלה
Psa 46:9 ט  לכו-חזו מפעלות יהוה--    אשר-שם שמות בארץ
Psa 46:10 י  משבית מלחמות    עד-קצה הארץ קשת ישבר וקצץ חנית    עגלות ישרף באש
Psa 46:11 יא  הרפו ודעו כי-אנכי אלהים    ארום בגוים ארום בארץ [ (Psalms 46:12) יב  יהוה צבאות עמנו    משגב-לנו אלהי יעקב סלה ]