Allepo, Psalms, Chapter 044

Psa 44:4 ד  כי לא בחרבם ירשו ארץ    וזרועם לא-הושיעה-למו כי-ימינך וזרועך ואור פניך--    כי רציתם
Psa 44:5 ה  אתה-הוא מלכי אלהים    צוה ישועות יעקב
Psa 44:6 ו  בך צרינו ננגח    בשמך נבוס קמינו
Psa 44:7 ז  כי לא בקשתי אבטח    וחרבי לא תושיעני
Psa 44:8 ח  כי הושעתנו מצרינו    ומשנאינו הבישות
Psa 44:9 ט  באלהים הללנו כל-היום    ושמך לעולם נודה סלה
Psa 44:10 י  אף-זנחת ותכלימנו    ולא-תצא בצבאותינו
Psa 44:11 יא  תשיבנו אחור מני-צר    ומשנאינו שסו למו
Psa 44:12 יב  תתננו כצאן מאכל    ובגוים זריתנו
Psa 44:13 יג  תמכר-עמך בלא-הון    ולא-רבית במחיריהם
Psa 44:14 יד  תשימנו חרפה לשכנינו    לעג וקלס לסביבותינו
Psa 44:15 טו  תשימנו משל בגוים    מנוד-ראש בלאמים
Psa 44:16 טז  כל-היום כלמתי נגדי    ובשת פני כסתני
Psa 44:17 יז  מקול מחרף ומגדף    מפני אויב ומתנקם
Psa 44:18 יח  כל-זאת באתנו ולא שכחנוך    ולא-שקרנו בבריתך
Psa 44:19 יט  לא-נסוג אחור לבנו    ותט אשרינו מני ארחך
Psa 44:20 כ  כי דכיתנו במקום תנים    ותכס עלינו בצלמות
Psa 44:21 כא  אם-שכחנו שם אלהינו    ונפרש כפינו לאל זר
Psa 44:22 כב  הלא אלהים יחקר-זאת    כי-הוא ידע תעלמות לב
Psa 44:23 כג  כי-עליך הרגנו כל-היום    נחשבנו כצאן טבחה
Psa 44:24 כד  עורה למה תישן אדני    הקיצה אל-תזנח לנצח
Psa 44:25 כה  למה-פניך תסתיר    תשכח ענינו ולחצנו
Psa 44:26 כו  כי שחה לעפר נפשנו    דבקה לארץ בטננו [ (Psalms 44:27) כז  קומה עזרתה לנו    ופדנו למען חסדך ]