Allepo, Psalms, Chapter 038

Psa 38:1 א  מזמור לדוד להזכיר
Psa 38:2 ב  יהוה--אל-בקצפך תוכיחני    ובחמתך תיסרני
Psa 38:3 ג  כי-חציך נחתו בי    ותנחת עלי ידך
Psa 38:4 ד  אין-מתם בבשרי מפני זעמך    אין-שלום בעצמי מפני חטאתי
Psa 38:5 ה  כי עונתי עברו ראשי    כמשא כבד יכבדו ממני
Psa 38:6 ו  הבאישו נמקו חבורתי    מפני אולתי
Psa 38:7 ז  נעויתי שחתי עד-מאד    כל-היום קדר הלכתי
Psa 38:8 ח  כי-כסלי מלאו נקלה    ואין מתם בבשרי
Psa 38:9 ט  נפוגותי ונדכיתי עד-מאד    שאגתי מנהמת לבי
Psa 38:10 י  אדני נגדך כל-תאותי    ואנחתי ממך לא-נסתרה
Psa 38:11 יא  לבי סחרחר עזבני כחי    ואור-עיני גם-הם אין אתי
Psa 38:12 יב  אהבי ורעי--מנגד נגעי יעמדו    וקרובי מרחק עמדו
Psa 38:13 יג  וינקשו מבקשי נפשי ודרשי רעתי דברו הוות    ומרמות כל-היום יהגו
Psa 38:14 יד  ואני כחרש לא אשמע    וכאלם לא יפתח-פיו
Psa 38:15 טו  ואהי--כאיש אשר לא-שמע    ואין בפיו תוכחות
Psa 38:16 טז  כי-לך יהוה הוחלתי    אתה תענה אדני אלהי
Psa 38:17 יז  כי-אמרתי פן-ישמחו-לי    במוט רגלי עלי הגדילו
Psa 38:18 יח  כי-אני לצלע נכון    ומכאובי נגדי תמיד
Psa 38:19 יט  כי-עוני אגיד    אדאג מחטאתי
Psa 38:20 כ  ואיבי חיים עצמו    ורבו שנאי שקר
Psa 38:21 כא  ומשלמי רעה תחת טובה--    ישטנוני תחת רדופי- (רדפי-) טוב
Psa 38:22 כב  אל-תעזבני יהוה    אלהי אל-תרחק ממני [ (Psalms 38:23) כג  חושה לעזרתי    אדני תשועתי ]