Psa 34:1 א  לדוד--    בשנותו את-טעמו לפני אבימלך ויגרשהו וילך
Psa 34:2 ב  אברכה את-יהוה בכל-עת    תמיד תהלתו בפי
Psa 34:3 ג  ביהוה תתהלל נפשי    ישמעו ענוים וישמחו
Psa 34:4 ד  גדלו ליהוה אתי    ונרוממה שמו יחדו
Psa 34:5 ה  דרשתי את-יהוה וענני    ומכל-מגורותי הצילני
Psa 34:6 ו  הביטו אליו ונהרו    ופניהם אל-יחפרו
Psa 34:7 ז  זה עני קרא ויהוה שמע    ומכל-צרותיו הושיעו
Psa 34:8 ח  חנה מלאך-יהוה סביב ליראיו    ויחלצם
Psa 34:9 ט  טעמו וראו כי-טוב יהוה    אשרי הגבר יחסה-בו
Psa 34:10 י  יראו את-יהוה קדשיו    כי-אין מחסור ליראיו
Psa 34:11 יא  כפירים רשו ורעבו    ודרשי יהוה לא-יחסרו כל-טוב
Psa 34:12 יב  לכו-בנים שמעו-לי    יראת יהוה אלמדכם
Psa 34:13 יג  מי-האיש החפץ חיים    אהב ימים לראות טוב
Psa 34:14 יד  נצר לשונך מרע    ושפתיך מדבר מרמה
Psa 34:15 טו  סור מרע ועשה-טוב    בקש שלום ורדפהו
Psa 34:16 טז  עיני יהוה אל-צדיקים    ואזניו אל-שועתם
Psa 34:17 יז  פני יהוה בעשי רע    להכרית מארץ זכרם
Psa 34:18 יח  צעקו ויהוה שמע    ומכל-צרותם הצילם
Psa 34:19 יט  קרוב יהוה לנשברי-לב    ואת-דכאי-רוח יושיע
Psa 34:20 כ  רבות רעות צדיק    ומכלם יצילנו יהוה
Psa 34:21 כא  שמר כל-עצמותיו    אחת מהנה לא נשברה
Psa 34:22 כב  תמותת רשע רעה    ושנאי צדיק יאשמו [ (Psalms 34:23) כג  פדה יהוה נפש עבדיו    ולא יאשמו כל-החסים בו ]