Allepo, Psalms, Chapter 026

Psa 26:1 א  לדוד  שפטני יהוה--    כי-אני בתמי הלכתי וביהוה בטחתי    לא אמעד
Psa 26:2 ב  בחנני יהוה ונסני    צרופה (צרפה) כליותי ולבי
Psa 26:3 ג  כי-חסדך לנגד עיני    והתהלכתי באמתך
Psa 26:4 ד  לא-ישבתי עם-מתי-שוא    ועם נעלמים לא אבוא
Psa 26:5 ה  שנאתי קהל מרעים    ועם-רשעים לא אשב
Psa 26:6 ו  ארחץ בנקיון כפי    ואסבבה את-מזבחך יהוה
Psa 26:7 ז  לשמע בקול תודה    ולספר כל-נפלאותיך
Psa 26:8 ח  יהוה--אהבתי מעון ביתך    ומקום משכן כבודך
Psa 26:9 ט  אל-תאסף עם-חטאים נפשי    ועם-אנשי דמים חיי
Psa 26:10 י  אשר-בידיהם זמה    וימינם מלאה שחד
Psa 26:11 יא  ואני בתמי אלך    פדני וחנני
Psa 26:12 יב  רגלי עמדה במישור    במקהלים אברך יהוה