Job 35:1 א                  ויען אליהו ויאמר
Job 35:2 ב  הזאת חשבת למשפט    אמרת צדקי מאל
Job 35:3 ג  כי-תאמר מה-יסכן-לך    מה-אעיל מחטאתי
Job 35:4 ד  אני אשיבך מלין--    ואת-רעיך עמך
Job 35:5 ה  הבט שמים וראה    ושור שחקים גבהו ממך
Job 35:6 ו  אם-חטאת מה-תפעל-בו    ורבו פשעיך מה-תעשה-לו
Job 35:7 ז  אם-צדקת מה-תתן-לו    או מה-מידך יקח
Job 35:8 ח  לאיש-כמוך רשעך    ולבן-אדם צדקתך
Job 35:9 ט  מרב עשוקים יזעיקו    ישועו מזרוע רבים
Job 35:10 י  ולא-אמר--איה אלוה עשי    נתן זמרות בלילה
Job 35:11 יא  מלפנו מבהמות ארץ    ומעוף השמים יחכמנו
Job 35:12 יב  שם יצעקו ולא יענה--    מפני גאון רעים
Job 35:13 יג  אך-שוא לא-ישמע אל    ושדי לא ישורנה
Job 35:14 יד  אף כי-תאמר לא תשורנו    דין לפניו ותחולל לו
Job 35:15 טו  ועתה--כי-אין פקד אפו    ולא-ידע בפש מאד
Job 35:16 טז  ואיוב הבל יפצה-פיהו    בבלי-דעת מלין יכבר