Allepo, Job, Chapter 27

Job 27:1 א                  ויסף איוב שאת משלו ויאמר
Job 27:2 ב  חי-אל הסיר משפטי    ושדי המר נפשי
Job 27:3 ג  כי-כל-עוד נשמתי בי    ורוח אלוה באפי
Job 27:4 ד  אם-תדברנה שפתי עולה    ולשוני אם-יהגה רמיה
Job 27:5 ה  חלילה לי    אם-אצדיק אתכם עד-אגוע--    לא-אסיר תמתי ממני
Job 27:6 ו  בצדקתי החזקתי ולא ארפה    לא-יחרף לבבי מימי
Job 27:7 ז  יהי כרשע איבי    ומתקוממי כעול
Job 27:8 ח  כי מה-תקות חנף כי יבצע    כי ישל אלוה נפשו
Job 27:9 ט  הצעקתו ישמע אל--    כי-תבוא עליו צרה
Job 27:10 י  אם-על-שדי יתענג    יקרא אלוה בכל-עת
Job 27:11 יא  אורה אתכם ביד-אל    אשר עם-שדי לא אכחד
Job 27:12 יב  הן-אתם כלכם חזיתם    ולמה-זה הבל תהבלו
Job 27:13 יג  זה חלק-אדם רשע עם-אל    ונחלת עריצים משדי יקחו
Job 27:14 יד  אם-ירבו בניו למו-חרב    וצאצאיו לא ישבעו-לחם
Job 27:15 טו  שרידיו במות יקברו    ואלמנתיו לא תבכינה
Job 27:16 טז  אם-יצבר כעפר כסף    וכחמר יכין מלבוש
Job 27:17 יז  יכין וצדיק ילבש    וכסף נקי יחלק
Job 27:18 יח  בנה כעש ביתו    וכסכה עשה נצר
Job 27:19 יט  עשיר ישכב ולא יאסף    עיניו פקח ואיננו
Job 27:20 כ  תשיגהו כמים בלהות    לילה גנבתו סופה
Job 27:21 כא  ישאהו קדים וילך    וישערהו ממקמו
Job 27:22 כב  וישלך עליו ולא יחמל    מידו ברוח יברח
Job 27:23 כג  ישפק עלימו כפימו    וישרק עליו ממקמו