Allepo, Job, Chapter 26

Job 26:1 א                  ויען איוב ויאמר
Job 26:2 ב  מה-עזרת ללא-כח    הושעת זרוע לא-עז
Job 26:3 ג  מה-יעצת ללא חכמה    ותשיה לרב הודעת
Job 26:4 ד  את-מי הגדת מלין    ונשמת-מי יצאה ממך
Job 26:5 ה  הרפאים יחוללו--    מתחת מים ושכניהם
Job 26:6 ו  ערום שאול נגדו    ואין כסות לאבדון
Job 26:7 ז  נטה צפון על-תהו    תלה ארץ על-בלימה
Job 26:8 ח  צרר-מים בעביו    ולא-נבקע ענן תחתם
Job 26:9 ט  מאחז פני-כסה    פרשז עליו עננו
Job 26:10 י  חק-חג על-פני-מים--    עד-תכלית אור עם-חשך
Job 26:11 יא  עמודי שמים ירופפו    ויתמהו מגערתו
Job 26:12 יב  בכחו רגע הים    ובתובנתו (ובתבונתו) מחץ רהב
Job 26:13 יג  ברוחו שמים שפרה    חללה ידו נחש ברח
Job 26:14 יד  הן-אלה קצות דרכו--    ומה-שמץ דבר נשמע-בו ורעם גבורתו    מי יתבונן