2Ch 27:1 א בן עשרים וחמש שנה יותם במלכו ושש עשרה שנה מלך בירושלם ושם אמו ירושה בת צדוק
2Ch 27:2 ב ויעש הישר בעיני יהוה ככל אשר עשה עזיהו אביו--רק לא בא אל היכל יהוה ועוד העם משחיתים
2Ch 27:3 ג הוא בנה את שער בית יהוה--העליון ובחומת העפל בנה לרב
2Ch 27:4 ד וערים בנה בהר יהודה ובחרשים בנה בירניות ומגדלים
2Ch 27:5 ה והוא נלחם עם מלך בני עמון ויחזק עליהם ויתנו לו בני עמון בשנה ההיא מאה ככר כסף ועשרת אלפים כרים חטים ושעורים עשרת אלפים  זאת השיבו לו בני עמון ובשנה השנית והשלשית
2Ch 27:6 ו ויתחזק יותם  כי הכין דרכיו לפני יהוה אלהיו
2Ch 27:7 ז ויתר דברי יותם וכל מלחמתיו ודרכיו--הנם כתובים על ספר מלכי ישראל ויהודה
2Ch 27:8 ח בן עשרים וחמש שנה היה במלכו ושש עשרה שנה מלך בירושלם
2Ch 27:9 ט וישכב יותם עם אבתיו ויקברו אתו בעיר דויד וימלך אחז בנו תחתיו  {פ}