1Ch 15:1 א ויעש לו בתים בעיר דויד ויכן מקום לארון האלהים ויט לו אהל
1Ch 15:2 ב אז אמר דויד לא לשאת את ארון האלהים כי אם הלוים  כי בם בחר יהוה לשאת את ארון יהוה ולשרתו--עד עולם  {פ}
1Ch 15:3 ג ויקהל דויד את כל ישראל אל ירושלם להעלות את ארון יהוה אל מקומו אשר הכין לו
1Ch 15:4 ד ויאסף דויד את בני אהרן ואת הלוים  {ס}
1Ch 15:5 ה לבני קהת--אוריאל השר ואחיו מאה ועשרים  {ס}
1Ch 15:6 ו לבני מררי--עשיה השר ואחיו מאתים ועשרים  {ס}
1Ch 15:7 ז לבני גרשום--יואל השר ואחיו מאה ושלשים  {ס}
1Ch 15:8 ח לבני אליצפן--שמעיה השר ואחיו מאתים  {ס}
1Ch 15:9 ט לבני חברון--אליאל השר ואחיו שמונים  {ס}
1Ch 15:10 י לבני עזיאל  עמינדב השר--ואחיו מאה ושנים עשר  {פ}
1Ch 15:11 יא ויקרא דויד לצדוק ולאביתר הכהנים וללוים לאוריאל עשיה ויואל שמעיה ואליאל ועמינדב  {ס}
1Ch 15:12 יב ויאמר להם אתם ראשי האבות ללוים התקדשו אתם ואחיכם והעליתם את ארון יהוה אלהי ישראל אל הכינותי לו
1Ch 15:13 יג כי למבראשונה לא אתם--פרץ יהוה אלהינו בנו כי לא דרשנהו כמשפט
1Ch 15:14 יד ויתקדשו הכהנים והלוים להעלות את ארון יהוה אלהי ישראל
1Ch 15:15 טו וישאו בני הלוים את ארון האלהים כאשר צוה משה כדבר יהוה--בכתפם במטות עליהם  {פ}
1Ch 15:16 טז ויאמר דויד לשרי הלוים להעמיד את אחיהם המשררים בכלי שיר נבלים וכנרות ומצלתים--משמיעים להרים בקול לשמחה  {פ}
1Ch 15:17 יז ויעמידו הלוים את הימן בן יואל ומן אחיו אסף בן ברכיהו  {ס}  ומן בני מררי אחיהם איתן בן קושיהו
1Ch 15:18 יח ועמהם אחיהם המשנים  זכריהו בן ויעזיאל ושמירמות ויחיאל ועני אליאב ובניהו ומעשיהו ומתתיהו ואליפלהו ומקניהו ועבד אדם ויעיאל--השערים
1Ch 15:19 יט והמשררים הימן אסף ואיתן--במצלתים נחשת להשמיע
1Ch 15:20 כ וזכריה ועזיאל ושמירמות ויחיאל ועני ואליאב ומעשיהו ובניהו--בנבלים על עלמות
1Ch 15:21 כא ומתתיהו ואליפלהו ומקניהו ועבד אדם ויעיאל ועזזיהו--בכנרות על השמינית לנצח
1Ch 15:22 כב וכנניהו שר הלוים במשא--יסר במשא כי מבין הוא
1Ch 15:23 כג וברכיה ואלקנה שערים לארון
1Ch 15:24 כד ושבניהו ויושפט ונתנאל ועמשי וזכריהו ובניהו ואליעזר הכהנים מחצצרים (מחצרים) בחצצרות לפני ארון האלהים ועבד אדם ויחיה שערים לארון
1Ch 15:25 כה ויהי דויד וזקני ישראל ושרי האלפים  ההלכים להעלות את ארון ברית יהוה מן בית עבד אדם--בשמחה  {פ}
1Ch 15:26 כו ויהי בעזר האלהים את הלוים נשאי ארון ברית יהוה ויזבחו שבעה פרים ושבעה אילים
1Ch 15:27 כז ודויד מכרבל במעיל בוץ וכל הלוים הנשאים את הארון והמשררים וכנניה השר המשא המשררים ועל דויד אפוד בד
1Ch 15:28 כח וכל ישראל מעלים את ארון ברית יהוה בתרועה ובקול שופר ובחצצרות ובמצלתים משמעים בנבלים וכנרות
1Ch 15:29 כט ויהי ארון ברית יהוה בא עד עיר דויד ומיכל בת שאול נשקפה בעד החלון ותרא את המלך דויד מרקד ומשחק ותבז לו בלבה  {פ}