Allepo, 1 Chronicles, Chapter 13

1Ch 13:1 א ויועץ דויד עם שרי האלפים והמאות--לכל נגיד
1Ch 13:2 ב ויאמר דויד לכל קהל ישראל אם עליכם טוב ומן יהוה אלהינו נפרצה נשלחה על אחינו הנשארים בכל ארצות ישראל ועמהם הכהנים והלוים בערי מגרשיהם ויקבצו אלינו
1Ch 13:3 ג ונסבה את ארון אלהינו אלינו  כי לא דרשנהו בימי שאול
1Ch 13:4 ד ויאמרו כל הקהל לעשות כן  כי ישר הדבר בעיני כל העם
1Ch 13:5 ה ויקהל דויד את כל ישראל מן שיחור מצרים ועד לבוא חמת להביא את ארון האלהים מקרית יערים
1Ch 13:6 ו ויעל דויד וכל ישראל בעלתה אל קרית יערים אשר ליהודה  להעלות משם את ארון האלהים יהוה יושב הכרובים--אשר נקרא שם
1Ch 13:7 ז וירכיבו את ארון האלהים על עגלה חדשה מבית אבינדב ועזא ואחיו נהגים בעגלה
1Ch 13:8 ח ודויד וכל ישראל משחקים לפני האלהים--בכל עז ובשירים ובכנרות ובנבלים ובתפים ובמצלתים ובחצצרות
1Ch 13:9 ט ויבאו עד גרן כידן וישלח עזא את ידו לאחז את הארון--כי שמטו הבקר
1Ch 13:10 י ויחר אף יהוה בעזא ויכהו על אשר שלח ידו על הארון וימת שם לפני אלהים
1Ch 13:11 יא ויחר לדויד כי פרץ יהוה פרץ בעזא ויקרא למקום ההוא פרץ עזא עד היום הזה
1Ch 13:12 יב ויירא דויד את האלהים ביום ההוא לאמר  היך אביא אלי את ארון האלהים
1Ch 13:13 יג ולא הסיר דויד את הארון אליו אל עיר דויד ויטהו אל בית עבד אדם הגתי
1Ch 13:14 יד וישב ארון האלהים עם בית עבד אדם בביתו--שלשה חדשים ויברך יהוה את בית עבד אדם ואת כל אשר לו  {ס}