1Ch 4:1 א בני יהודה  פרץ חצרון וכרמי וחור ושובל
1Ch 4:2 ב וראיה בן שובל הליד את יחת ויחת הליד את אחומי ואת להד אלה משפחות הצרעתי  {ס}
1Ch 4:3 ג ואלה אבי עיטם יזרעאל וישמא וידבש ושם אחותם הצללפוני
1Ch 4:4 ד ופנואל אבי גדר ועזר אבי חושה אלה בני חור בכור אפרתה אבי בית לחם
1Ch 4:5 ה ולאשחור אבי תקוע היו שתי נשים  חלאה ונערה
1Ch 4:6 ו ותלד לו נערה את אחזם ואת חפר ואת תימני ואת האחשתרי אלה בני נערה
1Ch 4:7 ז ובני חלאה--צרת יצחר (וצחר) ואתנן
1Ch 4:8 ח וקוץ הוליד את ענוב ואת הצבבה ומשפחת אחרחל בן הרום
1Ch 4:9 ט ויהי יעבץ נכבד מאחיו ואמו קראה שמו יעבץ לאמר כי ילדתי בעצב
1Ch 4:10 י ויקרא יעבץ לאלהי ישראל לאמר אם ברך תברכני והרבית את גבולי והיתה ידך עמי ועשית מרעה לבלתי עצבי--ויבא אלהים את אשר שאל  {ס}
1Ch 4:11 יא וכלוב אחי שוחה הוליד את מחיר  הוא אבי אשתון
1Ch 4:12 יב ואשתון הוליד את בית רפא ואת פסח ואת תחנה אבי עיר נחש אלה אנשי רכה  {ס}
1Ch 4:13 יג ובני קנז עתניאל ושריה ובני עתניאל חתת
1Ch 4:14 יד ומעונתי הוליד את עפרה ושריה הוליד את יואב אבי גיא חרשים--כי חרשים היו  {פ}
1Ch 4:15 טו ובני כלב בן יפנה עירו אלה ונעם ובני אלה וקנז
1Ch 4:16 טז ובני יהללאל--זיף וזיפה תיריא ואשראל
1Ch 4:17 יז ובן עזרה--יתר ומרד ועפר וילון ותהר את מרים ואת שמי ואת ישבח אבי אשתמע
1Ch 4:18 יח ואשתו היהדיה ילדה את ירד אבי גדור ואת חבר אבי שוכו ואת יקותיאל אבי זנוח ואלה בני בתיה בת פרעה אשר לקח מרד  {ס}
1Ch 4:19 יט ובני אשת הודיה--אחות נחם אבי קעילה הגרמי ואשתמע המעכתי
1Ch 4:20 כ ובני שימון--אמנון ורנה בן חנן ותולון (ותילון) ובני ישעי זוחת ובן זוחת
1Ch 4:21 כא בני שלה בן יהודה--ער אבי לכה ולעדה אבי מרשה ומשפחות בית עבדת הבץ לבית אשבע
1Ch 4:22 כב ויוקים ואנשי כזבא ויואש ושרף אשר בעלו למואב--וישבי לחם והדברים עתיקים
1Ch 4:23 כג המה היוצרים וישבי נטעים וגדרה עם המלך במלאכתו ישבו שם  {ס}
1Ch 4:24 כד בני שמעון  נמואל וימין יריב זרח שאול
1Ch 4:25 כה שלם בנו מבשם בנו משמע בנו
1Ch 4:26 כו ובני משמע--חמואל בנו זכור בנו שמעי בנו
1Ch 4:27 כז ולשמעי בנים ששה עשר ובנות שש ולאחיו אין בנים רבים וכל משפחתם לא הרבו עד בני יהודה  {ס}
1Ch 4:28 כח וישבו בבאר שבע ומולדה וחצר שועל
1Ch 4:29 כט ובבלהה ובעצם ובתולד
1Ch 4:30 ל ובבתואל ובחרמה ובציקלג
1Ch 4:31 לא ובבית מרכבות ובחצר סוסים ובבית בראי ובשערים אלה עריהם עד מלך דויד
1Ch 4:32 לב וחצריהם עיטם ועין רמון ותכן ועשן ערים חמש
1Ch 4:33 לג וכל חצריהם אשר סביבות הערים האלה--עד בעל  {ס}  זאת מושבתם והתיחשם להם
1Ch 4:34 לד ומשובב וימלך ויושה בן אמציה
1Ch 4:35 לה ויואל ויהוא בן יושביה בן שריה בן עשיאל
1Ch 4:36 לו ואליועיני ויעקבה וישוחיה ועשיה ועדיאל וישימאל--ובניה
1Ch 4:37 לז וזיזא בן שפעי בן אלון בן ידיה בן שמרי בן שמעיה
1Ch 4:38 לח אלה הבאים בשמות נשיאים במשפחותם ובית אבותיהם פרצו לרוב
1Ch 4:39 לט וילכו למבוא גדר עד למזרח הגיא לבקש מרעה לצאנם
1Ch 4:40 מ וימצאו מרעה שמן וטוב והארץ רחבת ידים ושקטת ושלוה  כי מן חם הישבים שם לפנים
1Ch 4:41 מא ויבאו אלה הכתובים בשמות בימי יחזקיהו מלך יהודה ויכו את אהליהם ואת המעינים (המעונים) אשר נמצאו שמה ויחרימם עד היום הזה וישבו תחתיהם  כי מרעה לצאנם שם
1Ch 4:42 מב ומהם מן בני שמעון הלכו להר שעיר אנשים חמש מאות ופלטיה ונעריה ורפיה ועזיאל בני ישעי--בראשם
1Ch 4:43 מג ויכו את שארית הפלטה לעמלק וישבו שם עד היום הזה  {פ}