Gen 25:1 א ויסף אברהם ויקח אשה ושמה קטורה
Gen 25:2 ב ותלד לו את זמרן ואת יקשן ואת מדן ואת מדין--ואת ישבק ואת שוח
Gen 25:3 ג ויקשן ילד את שבא ואת דדן ובני דדן היו אשורם ולטושם ולאמים
Gen 25:4 ד ובני מדין עיפה ועפר וחנך ואבידע ואלדעה כל אלה בני קטורה
Gen 25:5 ה ויתן אברהם את כל אשר לו ליצחק
Gen 25:6 ו ולבני הפילגשים אשר לאברהם נתן אברהם מתנת וישלחם מעל יצחק בנו בעודנו חי קדמה אל ארץ קדם
Gen 25:7 ז ואלה ימי שני חיי אברהם--אשר חי  מאת שנה ושבעים שנה וחמש שנים
Gen 25:8 ח ויגוע וימת אברהם בשיבה טובה זקן ושבע ויאסף אל עמיו
Gen 25:9 ט ויקברו אתו יצחק וישמעאל בניו אל מערת המכפלה  אל שדה עפרן בן צחר החתי אשר על פני ממרא
Gen 25:10 י השדה אשר קנה אברהם מאת בני חת--שמה קבר אברהם ושרה אשתו
Gen 25:11 יא ויהי אחרי מות אברהם ויברך אלהים את יצחק בנו וישב יצחק עם באר לחי ראי  {פ}
Gen 25:12 יב ואלה תלדת ישמעאל בן אברהם  אשר ילדה הגר המצרית שפחת שרה--לאברהם
Gen 25:13 יג ואלה שמות בני ישמעאל בשמתם לתולדתם  בכר ישמעאל נבית וקדר ואדבאל ומבשם
Gen 25:14 יד ומשמע ודומה ומשא
Gen 25:15 טו חדד ותימא יטור נפיש וקדמה
Gen 25:16 טז אלה הם בני ישמעאל ואלה שמתם בחצריהם ובטירתם--שנים עשר נשיאם לאמתם
Gen 25:17 יז ואלה שני חיי ישמעאל--מאת שנה ושלשים שנה ושבע שנים ויגוע וימת ויאסף אל עמיו
Gen 25:18 יח וישכנו מחוילה עד שור אשר על פני מצרים באכה אשורה על פני כל אחיו נפל  {פ}
Gen 25:19 יט ואלה תולדת יצחק בן אברהם  אברהם הוליד את יצחק
Gen 25:20 כ ויהי יצחק בן ארבעים שנה בקחתו את רבקה בת בתואל הארמי מפדן ארם--אחות לבן הארמי לו לאשה
Gen 25:21 כא ויעתר יצחק ליהוה לנכח אשתו כי עקרה הוא ויעתר לו יהוה ותהר רבקה אשתו
Gen 25:22 כב ויתרצצו הבנים בקרבה ותאמר אם כן למה זה אנכי ותלך לדרש את יהוה
Gen 25:23 כג ויאמר יהוה לה שני גיים (גוים) בבטנך ושני לאמים ממעיך יפרדו ולאם מלאם יאמץ ורב יעבד צעיר
Gen 25:24 כד וימלאו ימיה ללדת והנה תומם בבטנה
Gen 25:25 כה ויצא הראשון אדמוני כלו כאדרת שער ויקראו שמו עשו
Gen 25:26 כו ואחרי כן יצא אחיו וידו אחזת בעקב עשו ויקרא שמו יעקב ויצחק בן ששים שנה בלדת אתם
Gen 25:27 כז ויגדלו הנערים ויהי עשו איש ידע ציד איש שדה ויעקב איש תם ישב אהלים
Gen 25:28 כח ויאהב יצחק את עשו כי ציד בפיו ורבקה אהבת את יעקב
Gen 25:29 כט ויזד יעקב נזיד ויבא עשו מן השדה והוא עיף
Gen 25:30 ל ויאמר עשו אל יעקב הלעיטני נא מן האדם האדם הזה--כי עיף אנכי על כן קרא שמו אדום
Gen 25:31 לא ויאמר יעקב  מכרה כיום את בכרתך לי
Gen 25:32 לב ויאמר עשו הנה אנכי הולך למות ולמה זה לי בכרה
Gen 25:33 לג ויאמר יעקב השבעה לי כיום וישבע לו וימכר את בכרתו ליעקב
Gen 25:34 לד ויעקב נתן לעשו לחם ונזיד עדשים ויאכל וישת ויקם וילך ויבז עשו את הבכרה  {פ}