1Ki 17:1 א ויאמר אליהו התשבי מתשבי גלעד אל אחאב חי יהוה אלהי ישראל אשר עמדתי לפניו אם יהיה השנים האלה טל ומטר--כי אם לפי דברי  {ס}
1Ki 17:2 ב ויהי דבר יהוה אליו לאמר
1Ki 17:3 ג לך מזה ופנית לך קדמה ונסתרת בנחל כרית אשר על פני הירדן
1Ki 17:4 ד והיה מהנחל תשתה ואת הערבים צויתי לכלכלך שם
1Ki 17:5 ה וילך ויעש כדבר יהוה וילך וישב בנחל כרית אשר על פני הירדן
1Ki 17:6 ו והערבים מבאים לו לחם ובשר בבקר ולחם ובשר בערב ומן הנחל ישתה
1Ki 17:7 ז ויהי מקץ ימים וייבש הנחל  כי לא היה גשם בארץ  {ס}
1Ki 17:8 ח ויהי דבר יהוה אליו לאמר
1Ki 17:9 ט קום לך צרפתה אשר לצידון וישבת שם הנה צויתי שם אשה אלמנה לכלכלך
1Ki 17:10 י ויקם וילך צרפתה ויבא אל פתח העיר והנה שם אשה אלמנה מקששת עצים ויקרא אליה ויאמר קחי נא לי מעט מים בכלי ואשתה
1Ki 17:11 יא ותלך לקחת ויקרא אליה ויאמר לקחי נא לי פת לחם בידך
1Ki 17:12 יב ותאמר חי יהוה אלהיך אם יש לי מעוג כי אם מלא כף קמח בכד ומעט שמן בצפחת והנני מקששת שנים עצים ובאתי ועשיתיהו לי ולבני ואכלנהו ומתנו
1Ki 17:13 יג ויאמר אליה אליהו אל תיראי באי עשי כדברך אך עשי לי משם עגה קטנה בראשנה והוצאת לי ולך ולבנך תעשי באחרנה
1Ki 17:14 יד כי כה אמר יהוה אלהי ישראל כד הקמח לא תכלה וצפחת השמן לא תחסר  עד יום תתן (תת) יהוה גשם--על פני האדמה
1Ki 17:15 טו ותלך ותעשה כדבר אליהו ותאכל הוא והיא (היא והוא) וביתה ימים
1Ki 17:16 טז כד הקמח לא כלתה וצפחת השמן לא חסר--כדבר יהוה אשר דבר ביד אליהו  {פ}
1Ki 17:17 יז ויהי אחר הדברים האלה חלה בן האשה בעלת הבית ויהי חליו חזק מאד עד אשר לא נותרה בו נשמה
1Ki 17:18 יח ותאמר אל אליהו מה לי ולך איש האלהים  באת אלי להזכיר את עוני ולהמית את בני
1Ki 17:19 יט ויאמר אליה תני לי את בנך ויקחהו מחיקה ויעלהו אל העליה אשר הוא ישב שם וישכבהו על מטתו
1Ki 17:20 כ ויקרא אל יהוה ויאמר  יהוה אלהי--הגם על האלמנה אשר אני מתגורר עמה הרעות להמית את בנה
1Ki 17:21 כא ויתמדד על הילד שלש פעמים ויקרא אל יהוה ויאמר  יהוה אלהי תשב נא נפש הילד הזה על קרבו
1Ki 17:22 כב וישמע יהוה בקול אליהו ותשב נפש הילד על קרבו ויחי
1Ki 17:23 כג ויקח אליהו את הילד וירדהו מן העליה הביתה ויתנהו לאמו ויאמר אליהו ראי חי בנך
1Ki 17:24 כד ותאמר האשה אל אליהו עתה זה ידעתי כי איש אלהים אתה ודבר יהוה בפיך אמת  {פ}