1Ki 15:1 א ובשנת שמנה עשרה למלך ירבעם בן נבט מלך אבים על יהודה
1Ki 15:2 ב שלש שנים מלך בירושלם ושם אמו מעכה בת אבישלום
1Ki 15:3 ג וילך בכל חטאות אביו אשר עשה לפניו ולא היה לבבו שלם עם יהוה אלהיו כלבב דוד אביו
1Ki 15:4 ד כי למען דוד נתן יהוה אלהיו לו ניר בירושלם להקים את בנו אחריו ולהעמיד את ירושלם
1Ki 15:5 ה אשר עשה דוד את הישר בעיני יהוה ולא סר מכל אשר צוהו כל ימי חייו--רק בדבר אוריה החתי
1Ki 15:6 ו ומלחמה היתה בין רחבעם ובין ירבעם כל ימי חייו
1Ki 15:7 ז ויתר דברי אבים וכל אשר עשה--הלוא הם כתובים על ספר דברי הימים למלכי יהודה ומלחמה היתה בין אבים ובין ירבעם
1Ki 15:8 ח וישכב אבים עם אבתיו ויקברו אתו בעיר דוד וימלך אסא בנו תחתיו  {פ}
1Ki 15:9 ט ובשנת עשרים לירבעם מלך ישראל מלך אסא מלך יהודה
1Ki 15:10 י וארבעים ואחת שנה מלך בירושלם ושם אמו מעכה בת אבישלום
1Ki 15:11 יא ויעש אסא הישר בעיני יהוה כדוד אביו
1Ki 15:12 יב ויעבר הקדשים מן הארץ ויסר את כל הגללים אשר עשו אבתיו
1Ki 15:13 יג וגם את מעכה אמו ויסרה מגבירה אשר עשתה מפלצת לאשרה ויכרת אסא את מפלצתה וישרף בנחל קדרון
1Ki 15:14 יד והבמות לא סרו רק לבב אסא היה שלם עם יהוה--כל ימיו  {ס}
1Ki 15:15 טו ויבא את קדשי אביו וקדשו (וקדשי) בית יהוה כסף וזהב וכלים
1Ki 15:16 טז ומלחמה היתה בין אסא ובין בעשא מלך ישראל--כל ימיהם
1Ki 15:17 יז ויעל בעשא מלך ישראל על יהודה ויבן את הרמה--לבלתי תת יצא ובא לאסא מלך יהודה
1Ki 15:18 יח ויקח אסא את כל הכסף והזהב הנותרים באוצרות בית יהוה ואת אוצרות בית מלך (המלך) ויתנם ביד עבדיו וישלחם המלך אסא אל בן הדד בן טברמן בן חזיון מלך ארם הישב בדמשק לאמר
1Ki 15:19 יט ברית ביני ובינך בין אבי ובין אביך הנה שלחתי לך שחד כסף וזהב--לך הפרה את בריתך את בעשא מלך ישראל ויעלה מעלי
1Ki 15:20 כ וישמע בן הדד אל המלך אסא וישלח את שרי החילים אשר לו על ערי ישראל ויך את עיון ואת דן ואת אבל בית מעכה ואת כל כנרות על כל ארץ נפתלי
1Ki 15:21 כא ויהי כשמע בעשא ויחדל מבנות את הרמה וישב בתרצה
1Ki 15:22 כב והמלך אסא השמיע את כל יהודה אין נקי וישאו את אבני הרמה ואת עציה אשר בנה בעשא ויבן בם המלך אסא את גבע בנימן ואת המצפה
1Ki 15:23 כג ויתר כל דברי אסא וכל גבורתו וכל אשר עשה והערים אשר בנה--הלא המה כתובים על ספר דברי הימים למלכי יהודה רק לעת זקנתו חלה את רגליו
1Ki 15:24 כד וישכב אסא עם אבתיו ויקבר עם אבתיו בעיר דוד אביו וימלך יהושפט בנו תחתיו  {פ}
1Ki 15:25 כה ונדב בן ירבעם מלך על ישראל בשנת שתים לאסא מלך יהודה וימלך על ישראל שנתים
1Ki 15:26 כו ויעש הרע בעיני יהוה וילך בדרך אביו ובחטאתו אשר החטיא את ישראל
1Ki 15:27 כז ויקשר עליו בעשא בן אחיה לבית יששכר ויכהו בעשא בגבתון אשר לפלשתים ונדב וכל ישראל צרים על גבתון
1Ki 15:28 כח וימתהו בעשא--בשנת שלש לאסא מלך יהודה וימלך תחתיו
1Ki 15:29 כט ויהי כמלכו הכה את כל בית ירבעם--לא השאיר כל נשמה לירבעם עד השמדו  כדבר יהוה--אשר דבר ביד עבדו אחיה השילני
1Ki 15:30 ל על חטאות ירבעם אשר חטא ואשר החטיא את ישראל  בכעסו--אשר הכעיס את יהוה אלהי ישראל
1Ki 15:31 לא ויתר דברי נדב וכל אשר עשה  הלא הם כתובים על ספר דברי הימים--למלכי ישראל
1Ki 15:32 לב ומלחמה היתה בין אסא ובין בעשא מלך ישראל--כל ימיהם  {פ}
1Ki 15:33 לג בשנת שלש לאסא מלך יהודה--מלך בעשא בן אחיה על כל ישראל בתרצה עשרים וארבע שנה
1Ki 15:34 לד ויעש הרע בעיני יהוה וילך בדרך ירבעם ובחטאתו אשר החטיא את ישראל  {ס}