Allepo, Joshua, Chapter 19

Jos 19:1 א ויצא הגורל השני לשמעון--למטה בני שמעון למשפחותם ויהי נחלתם בתוך נחלת בני יהודה
Jos 19:2 ב ויהי להם בנחלתם--באר שבע ושבע ומולדה
Jos 19:3 ג וחצר שועל ובלה ועצם
Jos 19:4 ד ואלתולד ובתול וחרמה
Jos 19:5 ה וצקלג ובית המרכבות וחצר סוסה
Jos 19:6 ו ובית לבאות ושרוחן  ערים שלש עשרה וחצריהן
Jos 19:7 ז עין רמון ועתר ועשן  ערים ארבע וחצריהן
Jos 19:8 ח וכל החצרים אשר סביבות הערים האלה עד בעלת באר ראמת נגב  זאת נחלת מטה בני שמעון--למשפחתם
Jos 19:9 ט מחבל בני יהודה נחלת בני שמעון  כי היה חלק בני יהודה רב מהם וינחלו בני שמעון בתוך נחלתם  {פ}
Jos 19:10 י ויעל הגורל השלישי לבני זבולן למשפחתם ויהי גבול נחלתם עד שריד
Jos 19:11 יא ועלה גבולם לימה ומרעלה ופגע בדבשת ופגע אל הנחל אשר על פני יקנעם
Jos 19:12 יב ושב משריד קדמה מזרח השמש על גבול כסלת תבר ויצא אל הדברת ועלה יפיע
Jos 19:13 יג ומשם עבר קדמה מזרחה גתה חפר עתה קצין ויצא רמון המתאר הנעה
Jos 19:14 יד ונסב אתו הגבול מצפון חנתן והיו תצאתיו גי יפתח אל
Jos 19:15 טו וקטת ונהלל ושמרון וידאלה ובית לחם  ערים שתים עשרה וחצריהן
Jos 19:16 טז זאת נחלת בני זבולן למשפחותם--הערים האלה וחצריהן  {פ}
Jos 19:17 יז ליששכר--יצא הגורל הרביעי  לבני יששכר למשפחותם
Jos 19:18 יח ויהי גבולם--יזרעאלה והכסולת ושונם
Jos 19:19 יט וחפרים ושיאן ואנחרת
Jos 19:20 כ והרבית וקשיון ואבץ
Jos 19:21 כא ורמת ועין גנים ועין חדה ובית פצץ
Jos 19:22 כב ופגע הגבול בתבור ושחצומה (ושחצימה) ובית שמש והיו תצאות גבולם הירדן  ערים שש עשרה וחצריהן
Jos 19:23 כג זאת נחלת מטה בני יששכר--למשפחתם  הערים וחצריהן  {פ}
Jos 19:24 כד ויצא הגורל החמישי למטה בני אשר למשפחותם
Jos 19:25 כה ויהי גבולם--חלקת וחלי ובטן ואכשף
Jos 19:26 כו ואלמלך ועמעד ומשאל ופגע בכרמל הימה ובשיחור לבנת
Jos 19:27 כז ושב מזרח השמש בית דגן ופגע בזבלון ובגי יפתח אל צפונה בית העמק ונעיאל ויצא אל כבול משמאל
Jos 19:28 כח ועברן ורחב וחמון וקנה עד צידון רבה
Jos 19:29 כט ושב הגבול הרמה ועד עיר מבצר צר ושב הגבול חסה ויהיו (והיו) תצאתיו הימה מחבל אכזיבה
Jos 19:30 ל ועמה ואפק ורחב  ערים עשרים ושתים וחצריהן
Jos 19:31 לא זאת נחלת מטה בני אשר--למשפחתם  הערים האלה וחצריהן  {פ}
Jos 19:32 לב לבני נפתלי יצא הגורל הששי--לבני נפתלי למשפחתם
Jos 19:33 לג ויהי גבולם מחלף מאלון בצעננים ואדמי הנקב ויבנאל--עד לקום ויהי תצאתיו הירדן
Jos 19:34 לד ושב הגבול ימה אזנות תבור ויצא משם חוקקה ופגע בזבלון מנגב ובאשר פגע מים וביהודה הירדן מזרח השמש
Jos 19:35 לה וערי מבצר--הצדים צר וחמת רקת וכנרת
Jos 19:36 לו ואדמה והרמה וחצור
Jos 19:37 לז וקדש ואדרעי ועין חצור
Jos 19:38 לח ויראון ומגדל אל חרם ובית ענת ובית שמש  ערים תשע עשרה וחצריהן
Jos 19:39 לט זאת נחלת מטה בני נפתלי--למשפחתם  הערים וחצריהן  {פ}
Jos 19:40 מ למטה בני דן למשפחתם יצא הגורל השביעי
Jos 19:41 מא ויהי גבול נחלתם--צרעה ואשתאול ועיר שמש
Jos 19:42 מב ושעלבין ואילון ויתלה
Jos 19:43 מג ואילון ותמנתה ועקרון
Jos 19:44 מד ואלתקה וגבתון ובעלת
Jos 19:45 מה ויהד ובני ברק וגת רמון
Jos 19:46 מו ומי הירקון והרקון עם הגבול מול יפו
Jos 19:47 מז ויצא גבול בני דן מהם ויעלו בני דן וילחמו עם לשם וילכדו אותה ויכו אותה לפי חרב וירשו אותה וישבו בה ויקראו ללשם דן כשם דן אביהם
Jos 19:48 מח זאת נחלת מטה בני דן--למשפחתם  הערים האלה וחצריהן  {ס}
Jos 19:49 מט ויכלו לנחל את הארץ לגבולתיה ויתנו בני ישראל נחלה ליהושע בן נון בתוכם
Jos 19:50 נ על פי יהוה נתנו לו את העיר אשר שאל--את תמנת סרח בהר אפרים ויבנה את העיר וישב בה
Jos 19:51 נא אלה הנחלת אשר נחלו אלעזר הכהן ויהושע בן נון וראשי האבות למטות בני ישראל בגורל בשלה לפני יהוה--פתח אהל מועד ויכלו מחלק את הארץ  {פ}