Allepo, Numbers, Chapter 12

Num 12:1 א ותדבר מרים ואהרן במשה על אדות האשה הכשית אשר לקח  כי אשה כשית לקח
Num 12:2 ב ויאמרו הרק אך במשה דבר יהוה--הלא גם בנו דבר וישמע יהוה
Num 12:3 ג והאיש משה ענו מאד--מכל האדם אשר על פני האדמה  {ס}
Num 12:4 ד ויאמר יהוה פתאם אל משה ואל אהרן ואל מרים צאו שלשתכם אל אהל מועד ויצאו שלשתם
Num 12:5 ה וירד יהוה בעמוד ענן ויעמד פתח האהל ויקרא אהרן ומרים ויצאו שניהם
Num 12:6 ו ויאמר שמעו נא דברי אם יהיה נביאכם--יהוה במראה אליו אתודע בחלום אדבר בו
Num 12:7 ז לא כן עבדי משה  בכל ביתי נאמן הוא
Num 12:8 ח פה אל פה אדבר בו ומראה ולא בחידת ותמנת יהוה יביט ומדוע לא יראתם לדבר בעבדי במשה
Num 12:9 ט ויחר אף יהוה בם וילך
Num 12:10 י והענן סר מעל האהל והנה מרים מצרעת כשלג ויפן אהרן אל מרים והנה מצרעת
Num 12:11 יא ויאמר אהרן אל משה  בי אדני--אל נא תשת עלינו חטאת אשר נואלנו ואשר חטאנו
Num 12:12 יב אל נא תהי כמת אשר בצאתו מרחם אמו ויאכל חצי בשרו
Num 12:13 יג ויצעק משה אל יהוה לאמר  אל נא רפא נא לה  {פ}
Num 12:14 יד ויאמר יהוה אל משה ואביה ירק ירק בפניה--הלא תכלם שבעת ימים תסגר שבעת ימים מחוץ למחנה ואחר תאסף
Num 12:15 טו ותסגר מרים מחוץ למחנה שבעת ימים והעם לא נסע עד האסף מרים
Num 12:16 טז ואחר נסעו העם מחצרות ויחנו במדבר פארן  {פ}