Num 4:1 א וידבר יהוה אל משה ואל אהרן לאמר
Num 4:2 ב נשא את ראש בני קהת מתוך בני לוי--למשפחתם לבית אבתם
Num 4:3 ג מבן שלשים שנה ומעלה ועד בן חמשים שנה--כל בא לצבא לעשות מלאכה באהל מועד
Num 4:4 ד זאת עבדת בני קהת באהל מועד--קדש הקדשים
Num 4:5 ה ובא אהרן ובניו בנסע המחנה והורדו את פרכת המסך וכסו בה--את ארן העדת
Num 4:6 ו ונתנו עליו כסוי עור תחש ופרשו בגד כליל תכלת מלמעלה ושמו בדיו
Num 4:7 ז ועל שלחן הפנים יפרשו בגד תכלת ונתנו עליו את הקערת ואת הכפת ואת המנקית ואת קשות הנסך ולחם התמיד עליו יהיה
Num 4:8 ח ופרשו עליהם בגד תולעת שני וכסו אתו במכסה עור תחש ושמו את בדיו
Num 4:9 ט ולקחו בגד תכלת וכסו את מנרת המאור ואת נרתיה ואת מלקחיה ואת מחתתיה ואת כל כלי שמנה אשר ישרתו לה בהם
Num 4:10 י ונתנו אתה ואת כל כליה אל מכסה עור תחש ונתנו על המוט
Num 4:11 יא ועל מזבח הזהב יפרשו בגד תכלת וכסו אתו במכסה עור תחש ושמו את בדיו
Num 4:12 יב ולקחו את כל כלי השרת אשר ישרתו בם בקדש ונתנו אל בגד תכלת וכסו אותם במכסה עור תחש ונתנו על המוט
Num 4:13 יג ודשנו את המזבח ופרשו עליו בגד ארגמן
Num 4:14 יד ונתנו עליו את כל כליו אשר ישרתו עליו בהם את המחתת את המזלגת ואת היעים ואת המזרקת--כל כלי המזבח ופרשו עליו כסוי עור תחש--ושמו בדיו
Num 4:15 טו וכלה אהרן ובניו לכסת את הקדש ואת כל כלי הקדש בנסע המחנה ואחרי כן יבאו בני קהת לשאת ולא יגעו אל הקדש ומתו אלה משא בני קהת באהל מועד
Num 4:16 טז ופקדת אלעזר בן אהרן הכהן שמן המאור וקטרת הסמים ומנחת התמיד ושמן המשחה  פקדת כל המשכן וכל אשר בו בקדש ובכליו  {פ}
Num 4:17 יז וידבר יהוה אל משה ואל אהרן לאמר
Num 4:18 יח אל תכריתו את שבט משפחת הקהתי מתוך הלוים
Num 4:19 יט וזאת עשו להם וחיו ולא ימתו בגשתם את קדש הקדשים  אהרן ובניו יבאו ושמו אותם איש איש על עבדתו ואל משאו
Num 4:20 כ ולא יבאו לראות כבלע את הקדש ומתו  {פ}
Num 4:21 כא וידבר יהוה אל משה לאמר
Num 4:22 כב נשא את ראש בני גרשון--גם הם  לבית אבתם למשפחתם
Num 4:23 כג מבן שלשים שנה ומעלה עד בן חמשים שנה--תפקד אותם  כל הבא לצבא צבא לעבד עבדה באהל מועד
Num 4:24 כד זאת עבדת משפחת הגרשני--לעבד ולמשא
Num 4:25 כה ונשאו את יריעת המשכן ואת אהל מועד מכסהו ומכסה התחש אשר עליו מלמעלה ואת מסך--פתח אהל מועד
Num 4:26 כו ואת קלעי החצר ואת מסך פתח שער החצר אשר על המשכן ועל המזבח סביב ואת מיתריהם ואת כל כלי עבדתם ואת כל אשר יעשה להם ועבדו
Num 4:27 כז על פי אהרן ובניו תהיה כל עבדת בני הגרשני לכל משאם ולכל עבדתם ופקדתם עלהם במשמרת את כל משאם
Num 4:28 כח זאת עבדת משפחת בני הגרשני--באהל מועד ומשמרתם--ביד איתמר בן אהרן הכהן  {ס}
Num 4:29 כט בני מררי--למשפחתם לבית אבתם תפקד אתם
Num 4:30 ל מבן שלשים שנה ומעלה ועד בן חמשים שנה--תפקדם  כל הבא לצבא לעבד את עבדת אהל מועד
Num 4:31 לא וזאת משמרת משאם לכל עבדתם באהל מועד  קרשי המשכן ובריחיו ועמודיו ואדניו
Num 4:32 לב ועמודי החצר סביב ואדניהם ויתדתם ומיתריהם לכל כליהם ולכל עבדתם ובשמת תפקדו את כלי משמרת משאם
Num 4:33 לג זאת עבדת משפחת בני מררי לכל עבדתם באהל מועד--ביד איתמר בן אהרן הכהן
Num 4:34 לד ויפקד משה ואהרן ונשיאי העדה את בני הקהתי למשפחתם ולבית אבתם
Num 4:35 לה מבן שלשים שנה ומעלה ועד בן חמשים שנה--כל הבא לצבא לעבדה באהל מועד
Num 4:36 לו ויהיו פקדיהם למשפחתם--אלפים שבע מאות וחמשים
Num 4:37 לז אלה פקודי משפחת הקהתי כל העבד באהל מועד אשר פקד משה ואהרן על פי יהוה ביד משה  {ס}
Num 4:38 לח ופקודי בני גרשון למשפחותם ולבית אבתם
Num 4:39 לט מבן שלשים שנה ומעלה ועד בן חמשים שנה--כל הבא לצבא לעבדה באהל מועד
Num 4:40 מ ויהיו פקדיהם למשפחתם לבית אבתם--אלפים ושש מאות ושלשים
Num 4:41 מא אלה פקודי משפחת בני גרשון כל העבד באהל מועד--אשר פקד משה ואהרן על פי יהוה
Num 4:42 מב ופקודי משפחת בני מררי למשפחתם לבית אבתם
Num 4:43 מג מבן שלשים שנה ומעלה ועד בן חמשים שנה--כל הבא לצבא לעבדה באהל מועד
Num 4:44 מד ויהיו פקדיהם למשפחתם--שלשת אלפים ומאתים
Num 4:45 מה אלה פקודי משפחת בני מררי אשר פקד משה ואהרן על פי יהוה ביד משה
Num 4:46 מו כל הפקדים אשר פקד משה ואהרן ונשיאי ישראל--את הלוים  למשפחתם ולבית אבתם
Num 4:47 מז מבן שלשים שנה ומעלה ועד בן חמשים שנה  כל הבא לעבד עבדת עבדה ועבדת משא--באהל מועד
Num 4:48 מח ויהיו פקדיהם--שמנת אלפים וחמש מאות ושמנים
Num 4:49 מט על פי יהוה פקד אותם ביד משה--איש איש על עבדתו ועל משאו ופקדיו אשר צוה יהוה את משה  {פ}