Lev 23:1 א וידבר יהוה אל משה לאמר
Lev 23:2 ב דבר אל בני ישראל ואמרת אלהם מועדי יהוה אשר תקראו אתם מקראי קדש--אלה הם מועדי
Lev 23:3 ג ששת ימים תעשה מלאכה וביום השביעי שבת שבתון מקרא קדש כל מלאכה לא תעשו  שבת הוא ליהוה בכל מושבתיכם  {פ}
Lev 23:4 ד אלה מועדי יהוה מקראי קדש אשר תקראו אתם במועדם
Lev 23:5 ה בחדש הראשון בארבעה עשר לחדש--בין הערבים  פסח ליהוה
Lev 23:6 ו ובחמשה עשר יום לחדש הזה חג המצות ליהוה  שבעת ימים מצות תאכלו
Lev 23:7 ז ביום הראשון מקרא קדש יהיה לכם כל מלאכת עבדה לא תעשו
Lev 23:8 ח והקרבתם אשה ליהוה שבעת ימים ביום השביעי מקרא קדש כל מלאכת עבדה לא תעשו  {פ}
Lev 23:9 ט וידבר יהוה אל משה לאמר
Lev 23:10 י דבר אל בני ישראל ואמרת אלהם כי תבאו אל הארץ אשר אני נתן לכם וקצרתם את קצירה--והבאתם את עמר ראשית קצירכם אל הכהן
Lev 23:11 יא והניף את העמר לפני יהוה לרצנכם ממחרת השבת יניפנו הכהן
Lev 23:12 יב ועשיתם ביום הניפכם את העמר כבש תמים בן שנתו לעלה ליהוה
Lev 23:13 יג ומנחתו שני עשרנים סלת בלולה בשמן אשה ליהוה--ריח ניחח ונסכה יין רביעת ההין
Lev 23:14 יד ולחם וקלי וכרמל לא תאכלו עד עצם היום הזה--עד הביאכם את קרבן אלהיכם  חקת עולם לדרתיכם בכל משבתיכם  {ס}
Lev 23:15 טו וספרתם לכם ממחרת השבת מיום הביאכם את עמר התנופה  שבע שבתות תמימת תהיינה
Lev 23:16 טז עד ממחרת השבת השביעת תספרו חמשים יום והקרבתם מנחה חדשה ליהוה
Lev 23:17 יז ממושבתיכם תביאו לחם תנופה שתים שני עשרנים--סלת תהיינה חמץ תאפינה  בכורים ליהוה
Lev 23:18 יח והקרבתם על הלחם שבעת כבשים תמימם בני שנה ופר בן בקר אחד ואילם שנים  יהיו עלה ליהוה ומנחתם ונסכיהם אשה ריח ניחח ליהוה
Lev 23:19 יט ועשיתם שעיר עזים אחד לחטאת ושני כבשים בני שנה לזבח שלמים
Lev 23:20 כ והניף הכהן אתם על לחם הבכרים תנופה לפני יהוה על שני כבשים קדש יהיו ליהוה לכהן
Lev 23:21 כא וקראתם בעצם היום הזה מקרא קדש יהיה לכם--כל מלאכת עבדה לא תעשו  חקת עולם בכל מושבתיכם לדרתיכם
Lev 23:22 כב ובקצרכם את קציר ארצכם לא תכלה פאת שדך בקצרך ולקט קצירך לא תלקט לעני ולגר תעזב אתם אני יהוה אלהיכם  {פ}
Lev 23:23 כג וידבר יהוה אל משה לאמר
Lev 23:24 כד דבר אל בני ישראל לאמר  בחדש השביעי באחד לחדש יהיה לכם שבתון--זכרון תרועה מקרא קדש
Lev 23:25 כה כל מלאכת עבדה לא תעשו והקרבתם אשה ליהוה  {ס}
Lev 23:26 כו וידבר יהוה אל משה לאמר
Lev 23:27 כז אך בעשור לחדש השביעי הזה יום הכפרים הוא מקרא קדש יהיה לכם ועניתם את נפשתיכם והקרבתם אשה ליהוה
Lev 23:28 כח וכל מלאכה לא תעשו בעצם היום הזה  כי יום כפרים הוא לכפר עליכם לפני יהוה אלהיכם
Lev 23:29 כט כי כל הנפש אשר לא תענה בעצם היום הזה--ונכרתה מעמיה
Lev 23:30 ל וכל הנפש אשר תעשה כל מלאכה בעצם היום הזה--והאבדתי את הנפש ההוא מקרב עמה
Lev 23:31 לא כל מלאכה לא תעשו  חקת עולם לדרתיכם בכל משבתיכם
Lev 23:32 לב שבת שבתון הוא לכם ועניתם את נפשתיכם בתשעה לחדש בערב--מערב עד ערב תשבתו שבתכם  {פ}
Lev 23:33 לג וידבר יהוה אל משה לאמר
Lev 23:34 לד דבר אל בני ישראל לאמר  בחמשה עשר יום לחדש השביעי הזה חג הסכות שבעת ימים ליהוה
Lev 23:35 לה ביום הראשון מקרא קדש כל מלאכת עבדה לא תעשו
Lev 23:36 לו שבעת ימים תקריבו אשה ליהוה ביום השמיני מקרא קדש יהיה לכם והקרבתם אשה ליהוה עצרת הוא--כל מלאכת עבדה לא תעשו
Lev 23:37 לז אלה מועדי יהוה אשר תקראו אתם מקראי קדש  להקריב אשה ליהוה עלה ומנחה זבח ונסכים--דבר יום ביומו
Lev 23:38 לח מלבד שבתת יהוה ומלבד מתנותיכם ומלבד כל נדריכם ומלבד כל נדבתיכם אשר תתנו ליהוה
Lev 23:39 לט אך בחמשה עשר יום לחדש השביעי באספכם את תבואת הארץ תחגו את חג יהוה שבעת ימים ביום הראשון שבתון וביום השמיני שבתון
Lev 23:40 מ ולקחתם לכם ביום הראשון פרי עץ הדר כפת תמרים וענף עץ עבת וערבי נחל ושמחתם לפני יהוה אלהיכם--שבעת ימים
Lev 23:41 מא וחגתם אתו חג ליהוה שבעת ימים בשנה  חקת עולם לדרתיכם בחדש השביעי תחגו אתו
Lev 23:42 מב בסכת תשבו שבעת ימים כל האזרח בישראל ישבו בסכת
Lev 23:43 מג למען ידעו דרתיכם כי בסכות הושבתי את בני ישראל בהוציאי אותם מארץ מצרים  אני יהוה אלהיכם
Lev 23:44 מד וידבר משה את מעדי יהוה אל בני ישראל  {פ}