Allepo, Leviticus, Chapter 21

Lev 21:1 א ויאמר יהוה אל משה אמר אל הכהנים בני אהרן ואמרת אלהם לנפש לא יטמא בעמיו
Lev 21:2 ב כי אם לשארו הקרב אליו  לאמו ולאביו ולבנו ולבתו ולאחיו
Lev 21:3 ג ולאחתו הבתולה הקרובה אליו אשר לא היתה לאיש--לה יטמא
Lev 21:4 ד לא יטמא בעל בעמיו--להחלו
Lev 21:5 ה לא יקרחה (יקרחו) קרחה בראשם ופאת זקנם לא יגלחו ובבשרם--לא ישרטו שרטת
Lev 21:6 ו קדשים יהיו לאלהיהם ולא יחללו שם אלהיהם  כי את אשי יהוה לחם אלהיהם הם מקריבם--והיו קדש
Lev 21:7 ז אשה זנה וחללה לא יקחו ואשה גרושה מאישה לא יקחו  כי קדש הוא לאלהיו
Lev 21:8 ח וקדשתו--כי את לחם אלהיך הוא מקריב קדש יהיה לך--כי קדוש אני יהוה מקדשכם
Lev 21:9 ט ובת איש כהן כי תחל לזנות--את אביה היא מחללת באש תשרף  {ס}
Lev 21:10 י והכהן הגדול מאחיו אשר יוצק על ראשו שמן המשחה ומלא את ידו ללבש את הבגדים--את ראשו לא יפרע ובגדיו לא יפרם
Lev 21:11 יא ועל כל נפשת מת לא יבא  לאביו ולאמו לא יטמא
Lev 21:12 יב ומן המקדש לא יצא ולא יחלל את מקדש אלהיו  כי נזר שמן משחת אלהיו עליו--אני יהוה
Lev 21:13 יג והוא אשה בבתוליה יקח
Lev 21:14 יד אלמנה וגרושה וחללה זנה את אלה לא יקח  כי אם בתולה מעמיו יקח אשה
Lev 21:15 טו ולא יחלל זרעו בעמיו  כי אני יהוה מקדשו  {ס}
Lev 21:16 טז וידבר יהוה אל משה לאמר
Lev 21:17 יז דבר אל אהרן לאמר  איש מזרעך לדרתם אשר יהיה בו מום--לא יקרב להקריב לחם אלהיו
Lev 21:18 יח כי כל איש אשר בו מום לא יקרב  איש עור או פסח או חרם או שרוע
Lev 21:19 יט או איש אשר יהיה בו שבר רגל או שבר יד
Lev 21:20 כ או גבן או דק או תבלל בעינו או גרב או ילפת או מרוח אשך
Lev 21:21 כא כל איש אשר בו מום מזרע אהרן הכהן--לא יגש להקריב את אשי יהוה  מום בו--את לחם אלהיו לא יגש להקריב
Lev 21:22 כב לחם אלהיו מקדשי הקדשים ומן הקדשים יאכל
Lev 21:23 כג אך אל הפרכת לא יבא ואל המזבח לא יגש--כי מום בו ולא יחלל את מקדשי כי אני יהוה מקדשם
Lev 21:24 כד וידבר משה אל אהרן ואל בניו ואל כל בני ישראל  {פ}