Allepo, Leviticus, Chapter 19

Lev 19:1 א וידבר יהוה אל משה לאמר
Lev 19:2 ב דבר אל כל עדת בני ישראל ואמרת אלהם--קדשים תהיו  כי קדוש אני יהוה אלהיכם
Lev 19:3 ג איש אמו ואביו תיראו ואת שבתתי תשמרו  אני יהוה אלהיכם
Lev 19:4 ד אל תפנו אל האלילם ואלהי מסכה לא תעשו לכם  אני יהוה אלהיכם
Lev 19:5 ה וכי תזבחו זבח שלמים ליהוה--לרצנכם תזבחהו
Lev 19:6 ו ביום זבחכם יאכל וממחרת והנותר עד יום השלישי באש ישרף
Lev 19:7 ז ואם האכל יאכל ביום השלישי--פגול הוא לא ירצה
Lev 19:8 ח ואכליו עונו ישא כי את קדש יהוה חלל ונכרתה הנפש ההוא מעמיה
Lev 19:9 ט ובקצרכם את קציר ארצכם לא תכלה פאת שדך לקצר ולקט קצירך לא תלקט
Lev 19:10 י וכרמך לא תעולל ופרט כרמך לא תלקט  לעני ולגר תעזב אתם אני יהוה אלהיכם
Lev 19:11 יא לא תגנבו ולא תכחשו ולא תשקרו איש בעמיתו
Lev 19:12 יב ולא תשבעו בשמי לשקר  וחללת את שם אלהיך אני יהוה
Lev 19:13 יג לא תעשק את רעך ולא תגזל לא תלין פעלת שכיר אתך--עד בקר
Lev 19:14 יד לא תקלל חרש--ולפני עור לא תתן מכשל ויראת מאלהיך אני יהוה
Lev 19:15 טו לא תעשו עול במשפט--לא תשא פני דל ולא תהדר פני גדול  בצדק תשפט עמיתך
Lev 19:16 טז לא תלך רכיל בעמיך לא תעמד על דם רעך  אני יהוה
Lev 19:17 יז לא תשנא את אחיך בלבבך הוכח תוכיח את עמיתך ולא תשא עליו חטא
Lev 19:18 יח לא תקם ולא תטר את בני עמך ואהבת לרעך כמוך  אני יהוה
Lev 19:19 יט את חקתי תשמרו--בהמתך לא תרביע כלאים שדך לא תזרע כלאים ובגד כלאים שעטנז לא יעלה עליך
Lev 19:20 כ ואיש כי ישכב את אשה שכבת זרע והוא שפחה נחרפת לאיש והפדה לא נפדתה או חפשה לא נתן לה--בקרת תהיה לא יומתו כי לא חפשה
Lev 19:21 כא והביא את אשמו ליהוה אל פתח אהל מועד--איל אשם
Lev 19:22 כב וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא  {פ}
Lev 19:23 כג וכי תבאו אל הארץ ונטעתם כל עץ מאכל--וערלתם ערלתו את פריו שלש שנים יהיה לכם ערלים--לא יאכל
Lev 19:24 כד ובשנה הרביעת יהיה כל פריו--קדש הלולים ליהוה
Lev 19:25 כה ובשנה החמישת תאכלו את פריו להוסיף לכם תבואתו  אני יהוה אלהיכם
Lev 19:26 כו לא תאכלו על הדם לא תנחשו ולא תעוננו
Lev 19:27 כז לא תקפו פאת ראשכם ולא תשחית את פאת זקנך
Lev 19:28 כח ושרט לנפש לא תתנו בבשרכם וכתבת קעקע לא תתנו בכם  אני יהוה
Lev 19:29 כט אל תחלל את בתך להזנותה ולא תזנה הארץ ומלאה הארץ זמה
Lev 19:30 ל את שבתתי תשמרו ומקדשי תיראו  אני יהוה
Lev 19:31 לא אל תפנו אל האבת ואל הידענים אל תבקשו לטמאה בהם  אני יהוה אלהיכם
Lev 19:32 לב מפני שיבה תקום והדרת פני זקן ויראת מאלהיך אני יהוה  {ס}
Lev 19:33 לג וכי יגור אתך גר בארצכם--לא תונו אתו
Lev 19:34 לד כאזרח מכם יהיה לכם הגר הגר אתכם ואהבת לו כמוך--כי גרים הייתם בארץ מצרים  אני יהוה אלהיכם
Lev 19:35 לה לא תעשו עול במשפט במדה במשקל ובמשורה
Lev 19:36 לו מאזני צדק אבני צדק איפת צדק והין צדק--יהיה לכם  אני יהוה אלהיכם אשר הוצאתי אתכם מארץ מצרים
Lev 19:37 לז ושמרתם את כל חקתי ואת כל משפטי ועשיתם אתם  אני יהוה  {פ}