Ps 119:1 טוביהון דשלימי אורחא דמהלכין באוריתא דיהוה׃
Ps 119:2 טוביהון דנטרי סהידותיה בכל ליבא יתבעון אולפניה׃
Ps 119:3 ברם לא עבדו שקרא באורחתיה תקניא הליכו׃
Ps 119:4 אנת פקידתא פיקודך למטר״למינטר#1#״ לחדא׃
Ps 119:5 טב לי דתקנן אורחתי למטר״למנטר#1#״ גזירתך׃
Ps 119:6 הידין״אדין#1#״ לא אבהית באסתכלותי לכל פיקודך׃
Ps 119:7 אודי קדמך בתריצות לבא במלפי דיני זכוותך׃
Ps 119:8 ית גזירתך אטר לא תשבוק יתי עד לחדא׃
Ps 119:9 במא ידכי טליא ית אורחתיה למיטר היך דברייך׃
Ps 119:10 בכל לבי תבעית אולפנך לא תשלינני״תטעי יתי#1#״ מפיקודיך׃
Ps 119:11 בליבי א{ש}ישית מימרך מן בגלל דלא אחוב קדמך׃
Ps 119:12 בריך את יהוה אליף יתי גזירתך׃
Ps 119:13 בסיפוותי אשתעיתי כל דיני פומך׃
Ps 119:14 באורח סהידוותך חדיתי כעלוי כל מזלא״מולא#1#״׃
Ps 119:15 בפיקודיך אמליל ואסתכל אורחתך׃
Ps 119:16 בגזירתך איתפרנק לא אתנשי דבורך׃
Ps 119:17 שלים טב על עבדך איחי ואטר דבריך׃
Ps 119:18 גלי עיני ואסתכל פרישן מאוריתך׃
Ps 119:19 דייר אנא בארעא לא תסליק מיני פיקודיך׃
Ps 119:20 רגיגת נפשי לרגיגתא לפיקודיך בכל עידן׃
Ps 119:21 נזפתא זידונין ליטין דאשתליו״דטעיין#1#״ מפיקודיך׃
Ps 119:22 אעדי מעלי״מני#1#״ קלנא״חיסודא#1#״ ובוזתא״ובסרנותא#1#״ ארום סהידוותך נטרית׃
Ps 119:23 ארום יתבין רברבין מיני ממללין עבדך עסיק באחווית גזירתך׃
Ps 119:24 לחוד סהדותך פרנוקי מרי עצתי״מלכתי#1#״׃
Ps 119:25 אדבקת לעפרא נפשי אסי יתי כדבריך׃
Ps 119:26 אורחי מניתי״אשתעית#1#״ וקבילתא צלותי אליף יתי גזירתך׃
Ps 119:27 אורח פיקודייך תביינינני ואמליל בפרישותך׃
Ps 119:28 אגמת נפשי מדבונא קיים יתי כדבריך׃
Ps 119:29 אורח דשקרא אעדי מיני ואוריתך חייס לי׃
Ps 119:30 אורח הימנותא בחרית דיניך שווית׃
Ps 119:31 אידבקית בסהידותך יהוה לא תבהיתני׃
Ps 119:32 אורח פיקודייך ארהוט ארום תפתי לבי׃
Ps 119:33 אליף יתי יהוה אורח גזירתך ואנטרינה עד גמירא׃
Ps 119:34 תביינינני ואנטור אורייתך יהוה ואנטרינה בכל לבא׃
Ps 119:35 תדריכינני״תדברינני#1#״ בשביל פיקודיך ארום ביה צביתי׃
Ps 119:36 אצלי לבי לסהידוותך ולא לות ממונא׃
Ps 119:37 אעבר עיני מלמחמי שקרא בדברייך אסי יתי׃
Ps 119:38 אקים לעבדך מימרך די לדחלתך׃
Ps 119:39 אעבר חיסודי די דחילית ארום דיניך טבין׃
Ps 119:40 הא רגגית לפיקודיך בצדקתך אסי״אחי#1#״ יתי׃
Ps 119:41 וייתון עלי חסדייך יהוה פורקנך היך מימרך׃
Ps 119:42 ואתיב מחסדי פתגם ארום סברית בדבריך״במימרך#1#״׃
Ps 119:43 ולא תסליק מפומי פתגם דקשוט עד לחדא ארום לדיניך אוריכית׃
Ps 119:44 ואטור אוריתך תדירא לעלמי עלמין׃
Ps 119:45 ואיהך בפתיות אוריתא״אורחך#1#״ ארום פיקודיך תבעית׃
Ps 119:46 ואמליל בסהידוותך קביל מלכיא ולא אבהית׃
Ps 119:47 ואתפרנק בפיקודיך די רחימית׃
Ps 119:48 ואזקוף ידי לפיקודיך דרחימית ואמליל בגזירתך׃
Ps 119:49 אידכר פתגמא לעבדך די אורכתני׃
Ps 119:50 דא היא״הות#1#״ תנחומתי בסיגופי ארום מימרך קיימת יתי׃
Ps 119:51 זדונין ממיקנין לי עד לחד מאוריתך לא אצליתי׃
Ps 119:52 אדכרית דינייך מן עלמא יהוה ואתנחמית׃
Ps 119:53 רתיתא אחידת יתי מרשיעי דשבקין אוריתך׃
Ps 119:54 תושבחן הוו לי גזירתך בבית מדורי׃
Ps 119:55 אדכרית בליליא שמך יהוה ונטרית אוריתך׃
Ps 119:56 דא הות לי לזכותא ארום פיקודיך נטרית׃
Ps 119:57 חולקי יהוה אמרית למיטר דבריך׃
Ps 119:58 צליתי קדמך בכל לבא חוס עלי היך מימרך׃
Ps 119:59 חשיבית לאוטבא אורחי ואתיב ריגלי לסהידותך׃
Ps 119:60 זרזית ולא אתעכבית למיטר פקודיך׃
Ps 119:61 סיעת רשיעיא אתכנשו עלי אוריתך לא אתנשיתי״נשיתי#1#״׃
Ps 119:62 בפלגות ליליא אקום לשבחא קדמך מטול דיני צדקך״צדקתך#1#״׃
Ps 119:63 חברא אנא לכל דדחלן מינך ולנטרי פיקודיך׃
Ps 119:64 טובך יהוה מליא ארעא גזירתך אליף יתי׃
Ps 119:65 טבא עבדת עם עבדך יהוה היך דבריך׃
Ps 119:66 שפיר טעם ומנדעא אליף יתי ארום בפיקודיך הימינית׃
Ps 119:67 עד לא אסתגיף אנא שלי וכדון מימרך נטרית׃
Ps 119:68 טב את״אנת#1#״ ומיטיב אליף יתי גזירתך׃
Ps 119:69 חברו עלי שקרא זידונין אנא בכל לבא אטור פיקודיך׃
Ps 119:70 אטפש״איטמטם#1#״ היך תרב יצרא דלבהון אנא אורייתך פירנוקי׃
Ps 119:71 טב לי ארום אתעניית מן בגלל דאילף גזירתך׃
Ps 119:72 טב לי אוריית פומך מן אלף ככרין דהב וסימא׃
Ps 119:73 אידך עבדו יתי ואתקינו יתי תבייניני ואילף פיקודיך׃
Ps 119:74 דחלייך יחמון יתי ויחדון ארום לפתגמך אוריכית׃
Ps 119:75 ידעית יהוה ארום זכאין דיניך ובקושטא סגפתני׃
Ps 119:76 יהי כדון חסדך לנחמותי היך מימרך לעבדך׃
Ps 119:77 ייתון עלי רחמך ואיחי ארום אוריתך פירנוקי׃
Ps 119:78 יבהתון זדונין ארום על שקרא עויתו יתי אנא אמליל בפיקודיך׃
Ps 119:79 יתובון לאולפני דחליך וידעין סהדוותך׃
Ps 119:80 יהי לבי דלא מום בגזירתך מן בגלל דלא אבהית׃
Ps 119:81 רגיגת לפורקנך נפשי לפתגמך אוריכית׃
Ps 119:82 ספו עיני למימרך למימר אימתי תנחם יתי׃
Ps 119:83 ארום הויתי היך זרנוקא דתלי בקטרא גזרתך״קיימך#1#״ לא אתנשיתי׃
Ps 119:84 כמה יומי עבדך אימתי תעביד ברודפי דינא׃
Ps 119:85 כרו לי זדונין שווחן דלא פקידתנון באוריתך׃
Ps 119:86 כל פיקודיך קושטא על שקרא רדפו יתי סעדיני׃
Ps 119:87 כזעיר שיציאו יתי בארעא ואנא לא שבקית פיקודיך׃
Ps 119:88 היך חיסדך קיים יתי ואטור סהדות פומך׃
Ps 119:89 לעלמא יהוה פתגמך קיים בשמיא׃
Ps 119:90 לדר ודר הימנותך אתקנתא ארעא וקיימא׃
Ps 119:91 לדיניך קמו יומנא״יומא דין#1#״ ארום כולהון עבדך׃
Ps 119:92 אלולי אוריתך פרנוקי הידין״אדין#1#״ הובדית בסגופי׃
Ps 119:93 לעלם לא אתנשי״אנשי#1#״ פיקודיך ארום בהון קיימתני׃
Ps 119:94 די לך אנא פרוק יתי ארום פיקודיך תבעית׃
Ps 119:95 לוותי אמתינו רשיעיא להובדא יתי סהידוותך אתביין׃
Ps 119:96 לכל מה \דאשתרי ואשתכלל ״דאשתדל ואסתכל#1#״ חמיתי סיפא פתייא תפקדתך לחדא׃
Ps 119:97 מה״כמה#1#״ רחימית אוריתך כל יומא היא שותי׃
Ps 119:98 יתיר מבעלי דבבי מחכמה יתי פיקודיך ארום לעלם היא דילי׃
Ps 119:99 מכל מאלפי אסכלית ארום סהידוותך שותא לי״דילי#1#״׃
Ps 119:100 מן חכימיא אתביין ארום פיקודיך נטרית׃
Ps 119:101 מכל אורח בישא מנעית ריגלי מן בגלל אטור דבריך׃
Ps 119:102 מן דיניך לא עדית ארום את אליפתני׃
Ps 119:103 מה״כמה#1#״ חלין למוריגי מימריך בסימן יתיר מן דובשא לפומי׃
Ps 119:104 מפקודיך אתביין מטול היכנא סניתי כל בר נש דמשקר׃
Ps 119:105 היך שרגא די מנהרא לריגלי דבריך ונהורא לכבשי׃
Ps 119:106 אומיתי וקיימית למטר פקודי״דיני#1#״ זכותך׃
Ps 119:107 אסתגפית עד לחדא יהוה אסי יתי היך דבריך׃
Ps 119:108 נסבתא דפומי אתרעי כדון יהוה ודינך אליף יתי׃
Ps 119:109 נפשי מסתכנא על גב ידי תדירא ואוריתך לא אתנשיתי׃
Ps 119:110 סדרו רשיעיא פחא״קולא#1#״ לי ומפקודיך לא {ת}עיתי׃
Ps 119:111 אחסנית סהדוותך לעלם ארום חדות לבי הינון׃
Ps 119:112 אצליתי לבי למעבד גזירתך לעלם עד סופא׃
Ps 119:113 דחשבין מחשבן סריקן סניתי ואוריתך רחימית׃
Ps 119:114 טומרי ותריסי את לפתגמך אוריכית׃
Ps 119:115 זורו מיני מבאשין ואטור פקודי אלהי׃
Ps 119:116 סמוך יתי במימרך ואחי ולא תבהית יתי מן כליותי׃
Ps 119:117 סעוד יתי ואתפרק ואגעגע באוריתך״בגזירתך#1#״ תדירא׃
Ps 119:118 כבשתא כל דשלו״דטעיין#1#״ מגזירתך ארום שקרא נכלהון׃
Ps 119:119 פסולייא פסקתא בטילתא כל רשיעי ארעא מטול היכנא רחימית סהדוותך׃
Ps 119:120 מצלהב מדחלך״מדלוחך#1#״ בסרי ומדיניך דחילית׃
Ps 119:121 עבדית דינא וצדקתא לא תשבקינני לטלומי׃
Ps 119:122 בסים עבדך לטבא לא יטלומון יתי זידונין׃
Ps 119:123 עיני סברו לפורקנך ולמימר צדקך׃
Ps 119:124 עבד עם עבדך היך חסדך וגזירתך אליף יתי׃
Ps 119:125 עבדך אנא תביין יתי ואידע סהידותך׃
Ps 119:126 עידן למעבד רעותא דיהוה אפישו תלמידיא אורייתך׃
Ps 119:127 מטול היכנא רחימית פקודיך מדהבא ומן אובריזא׃
Ps 119:128 מטול היכנא כל פיקודיא כולהון תריצתינון כל אורח שקרא סניתי׃
Ps 119:129 פרישן סהדוותך מטול היכנא נטרתנון נפשי׃
Ps 119:130 גליף דבריך ינהר חשיכיא יתביין שרגיגי׃
Ps 119:131 פומי פתחית ואלפית ארום לפקודיך צביתי׃
Ps 119:132 אתפני לותי וחוס עלי כהילכתא לרחימי שמך׃
Ps 119:133 אסתורי אתקין במימרך ולא תשליט בי כל שקר׃
Ps 119:134 פרוק יתי מטלומא דבר נשא ואטור פקודיך׃
Ps 119:135 זיו אפך אנהר בעבדך ואליפני ית גזירתך׃
Ps 119:136 ט{יי}פי מיא ייחתון עיני על מטול דלא נטרו אוריתא׃
Ps 119:137 זכיי את יהוה ותריצין דיניך׃
Ps 119:138 פקידתא צדקתא״זכות#1#״ סהידותא והימנותא לחדא׃
Ps 119:139 מגרת יתי טיננתי ארום איתנשיאו דבריך מעיקי׃
Ps 119:140 סנינא מימרך לחדא ועבדך רחימה׃
Ps 119:141 זוטר אנא ובסיר פיקודיך לא אתנשיתי׃
Ps 119:142 צדקתך צדקא לעלמא ואוריתך קשוט׃
Ps 119:143 עקא ומעיקא ערעו יתי פקודיך פירנוקי׃
Ps 119:144 צדקתא סהדוותך לעלם תבייניני ואתקים׃
Ps 119:145 קריתי בכל לבא עני יתי יהוה גזירתך אנטור׃
Ps 119:146 קריתך פרוק יתי ואנטור סהידותך׃
Ps 119:147 אקדימית בשפרפרא וצליתי לפתגמך אוריכית׃
Ps 119:148 אקדימו עיני מטרתא דצפר ורמש למללא במימרך׃
Ps 119:149 קלי שמע היך חסדך יהוה היך דינך קיים יתי׃
Ps 119:150 קריבו רדפי זנו מאוריתך אתרחקו׃
Ps 119:151 קריב את יהוה וכל פיקודיך קשוט׃
Ps 119:152 מן לקדמין חכימית מן סהידותך ארום לעלם יסדתינון׃
Ps 119:153 חמי סיגופי ופצי יתי ארום אוריתך לא אתנשיתי׃
Ps 119:154 נצי מצותי ופרוק יתי למימרך אסי״אחי#1#״ יתי׃
Ps 119:155 רחיק מן רשיעי פורקנא ארום גזירתך לא תבעו׃
Ps 119:156 רחמך סגיעין יהוה היך דיניך אסי״אחי#1#״ יתי׃
Ps 119:157 סגיעין רדפי ומעיקי מסהדותך לא אצליתי׃
Ps 119:158 חמיתי בזוזי ואידיינית״ואתדנית#1#״ עמהון די מימרך לא נטרו׃
Ps 119:159 חמי ארום פיקודיך רחימית יהוה היך חסדך אסי״אחי#1#״ יתי׃
Ps 119:160 שירוי פתגמך קשוט ולעלם כל דיני צדקתך׃
Ps 119:161 רברבין רדפו יתי מגן ומפתגמך דלח לבי׃
Ps 119:162 חדי אנא על מימרך היך גבר דמשכח עדי סגי׃
Ps 119:163 שקרא סניתי ורחיקית אוריתך רחימית׃
Ps 119:164 שבע זמנין ביומא שבחית יתך מטול דיני צידקך׃
Ps 119:165 שלם סגי לרחימי אוריתך בעלמא הדין ולית להון תקלא לעלמא דאתי׃
Ps 119:166 סברית לפורקנך יהוה ופיקודיך עבדית׃
Ps 119:167 נטרת נפשי סהדוותך ורחימתינון״וארחמינון#1#״ לחדא׃
Ps 119:168 נטרית פיקודיך וסהידותך ארום כל אורחותי לקבלך׃
Ps 119:169 תתקרב צלותי קדמך יהוה היך פתגמך תביינינני׃
Ps 119:170 תיתי צלותי קדמך היך מימרך פצי יתי׃
Ps 119:171 תבעיין ספותי תושבחתא ארום תלפינני גזירתך׃
Ps 119:172 תתיב לישני מימרך ארום כל דיניך צדקתא׃
Ps 119:173 תהא ידך לסייעותי ארום פיקודיך רעיתי׃
Ps 119:174 רגיגית לפורקנך יהוה ואוריתך פרנוקי׃
Ps 119:175 תחי נפשי ותשבחינך ודיניך יסייעוני׃
Ps 119:176 תעית היך עאן״אמרא#1#״ דמתבד בעי עבדך ארום פקודיך לא אתנשיתי׃