Latin Vulgata, 1 Timothy, Chapter 02

Pray for All People
1Ti 2:1  obsecro igitur primo omnium fieri obsecrationes orationes postulationes gratiarum actiones pro omnibus hominibus
1Ti 2:2  pro regibus et omnibus qui in sublimitate sunt ut quietam et tranquillam vitam agamus in omni pietate et castitate
1Ti 2:3  hoc enim bonum est et acceptum coram salutari nostro Deo
1Ti 2:4  qui omnes homines vult salvos fieri et ad agnitionem veritatis venire
1Ti 2:5  unus enim Deus unus et mediator Dei et hominum homo Christus Iesus
1Ti 2:6  qui dedit redemptionem semet ipsum pro omnibus testimonium temporibus suis
1Ti 2:7  in quo positus sum ego praedicator et apostolus veritatem dico non mentior doctor gentium in fide et veritate
1Ti 2:8  volo ergo viros orare in omni loco levantes puras manus sine ira et disceptatione
1Ti 2:9  similiter et mulieres in habitu ornato cum verecundia et sobrietate ornantes se non in tortis crinibus aut auro aut margaritis vel veste pretiosa
1Ti 2:10  sed quod decet mulieres promittentes pietatem per opera bona
1Ti 2:11  mulier in silentio discat cum omni subiectione
1Ti 2:12  docere autem mulieri non permitto neque dominari in virum sed esse in silentio
1Ti 2:13  Adam enim primus formatus est deinde Eva
1Ti 2:14  et Adam non est seductus mulier autem seducta in praevaricatione fuit
1Ti 2:15  salvabitur autem per filiorum generationem si permanserint in fide et dilectione et sanctificatione cum sobrietate