The Birth of Jesus Christ
Luk 2:1  factum est autem in diebus illis exiit edictum a Caesare Augusto ut describeretur universus orbis
Luk 2:2  haec descriptio prima facta est praeside Syriae Cyrino
Luk 2:3  et ibant omnes ut profiterentur singuli in suam civitatem
Luk 2:4  ascendit autem et Ioseph a Galilaea de civitate Nazareth in Iudaeam civitatem David quae vocatur Bethleem eo quod esset de domo et familia David
Luk 2:5  ut profiteretur cum Maria desponsata sibi uxore praegnate
Luk 2:6  factum est autem cum essent ibi impleti sunt dies ut pareret
Luk 2:7  et peperit filium suum primogenitum et pannis eum involvit et reclinavit eum in praesepio quia non erat eis locus in diversorio
The Shepherds and the Angels
Luk 2:8  et pastores erant in regione eadem vigilantes et custodientes vigilias noctis supra gregem suum
Luk 2:9  et ecce angelus Domini stetit iuxta illos et claritas Dei circumfulsit illos et timuerunt timore magno
Luk 2:10  et dixit illis angelus nolite timere ecce enim evangelizo vobis gaudium magnum quod erit omni populo
Luk 2:11  quia natus est vobis hodie salvator qui est Christus Dominus in civitate David
Luk 2:12  et hoc vobis signum invenietis infantem pannis involutum et positum in praesepio
Luk 2:13  et subito facta est cum angelo multitudo militiae caelestis laudantium Deum et dicentium
Luk 2:14  gloria in altissimis Deo et in terra pax in hominibus bonae voluntatis
Luk 2:15  et factum est ut discesserunt ab eis angeli in caelum pastores loquebantur ad invicem transeamus usque Bethleem et videamus hoc verbum quod factum est quod fecit Dominus et ostendit nobis
Luk 2:16  et venerunt festinantes et invenerunt Mariam et Ioseph et infantem positum in praesepio
Luk 2:17  videntes autem cognoverunt de verbo quod dictum erat illis de puero hoc
Luk 2:18  et omnes qui audierunt mirati sunt et de his quae dicta erant a pastoribus ad ipsos
Luk 2:19  Maria autem conservabat omnia verba haec conferens in corde suo
Luk 2:20  et reversi sunt pastores glorificantes et laudantes Deum in omnibus quae audierant et viderant sicut dictum est ad illos
Luk 2:21  et postquam consummati sunt dies octo ut circumcideretur vocatum est nomen eius Iesus quod vocatum est ab angelo priusquam in utero conciperetur
Jesus Presented at the Temple
Luk 2:22  et postquam impleti sunt dies purgationis eius secundum legem Mosi tulerunt illum in Hierusalem ut sisterent eum Domino
Luk 2:23  sicut scriptum est in lege Domini quia omne masculinum adaperiens vulvam sanctum Domino vocabitur
Luk 2:24  et ut darent hostiam secundum quod dictum est in lege Domini par turturum aut duos pullos columbarum
Luk 2:25  et ecce homo erat in Hierusalem cui nomen Symeon et homo iste iustus et timoratus expectans consolationem Israhel et Spiritus Sanctus erat in eo
Luk 2:26  et responsum acceperat ab Spiritu Sancto non visurum se mortem nisi prius videret Christum Domini
Luk 2:27  et venit in Spiritu in templum et cum inducerent puerum Iesum parentes eius ut facerent secundum consuetudinem legis pro eo
Luk 2:28  et ipse accepit eum in ulnas suas et benedixit Deum et dixit
Luk 2:29  nunc dimittis servum tuum Domine secundum verbum tuum in pace
Luk 2:30  quia viderunt oculi mei salutare tuum
Luk 2:31  quod parasti ante faciem omnium populorum
Luk 2:32  lumen ad revelationem gentium et gloriam plebis tuae Israhel
Luk 2:33  et erat pater eius et mater mirantes super his quae dicebantur de illo
Luk 2:34  et benedixit illis Symeon et dixit ad Mariam matrem eius ecce positus est hic in ruinam et resurrectionem multorum in Israhel et in signum cui contradicetur
Luk 2:35  et tuam ipsius animam pertransiet gladius ut revelentur ex multis cordibus cogitationes
Luk 2:36  et erat Anna prophetissa filia Phanuhel de tribu Aser haec processerat in diebus multis et vixerat cum viro suo annis septem a virginitate sua
Luk 2:37  et haec vidua usque ad annos octoginta quattuor quae non discedebat de templo ieiuniis et obsecrationibus serviens nocte ac die
Luk 2:38  et haec ipsa hora superveniens confitebatur Domino et loquebatur de illo omnibus qui expectabant redemptionem Hierusalem
The Return to Nazareth
Luk 2:39  et ut perfecerunt omnia secundum legem Domini reversi sunt in Galilaeam in civitatem suam Nazareth
Luk 2:40  puer autem crescebat et confortabatur plenus sapientia et gratia Dei erat in illo
The Boy Jesus in the Temple
Luk 2:41  et ibant parentes eius per omnes annos in Hierusalem in die sollemni paschae
Luk 2:42  et cum factus esset annorum duodecim ascendentibus illis in Hierosolymam secundum consuetudinem diei festi
Luk 2:43  consummatisque diebus cum redirent remansit puer Iesus in Hierusalem et non cognoverunt parentes eius
Luk 2:44  existimantes autem illum esse in comitatu venerunt iter diei et requirebant eum inter cognatos et notos
Luk 2:45  et non invenientes regressi sunt in Hierusalem requirentes eum
Luk 2:46  et factum est post triduum invenerunt illum in templo sedentem in medio doctorum audientem illos et interrogantem
Luk 2:47  stupebant autem omnes qui eum audiebant super prudentia et responsis eius
Luk 2:48  et videntes admirati sunt et dixit mater eius ad illum fili quid fecisti nobis sic ecce pater tuus et ego dolentes quaerebamus te
Luk 2:49  et ait ad illos quid est quod me quaerebatis nesciebatis quia in his quae Patris mei sunt oportet me esse
Luk 2:50  et ipsi non intellexerunt verbum quod locutus est ad illos
Luk 2:51  et descendit cum eis et venit Nazareth et erat subditus illis et mater eius conservabat omnia verba haec in corde suo
Luk 2:52  et Iesus proficiebat sapientia aetate et gratia apud Deum et homines