Jesus Heals a Paralytic
Mar 2:1  et iterum intravit Capharnaum post dies
Mar 2:2  et auditum est quod in domo esset et convenerunt multi ita ut non caperet neque ad ianuam et loquebatur eis verbum
Mar 2:3  et venerunt ferentes ad eum paralyticum qui a quattuor portabatur
Mar 2:4  et cum non possent offerre eum illi prae turba nudaverunt tectum ubi erat et patefacientes submiserunt grabattum in quo paralyticus iacebat
Mar 2:5  cum vidisset autem Iesus fidem illorum ait paralytico fili dimittuntur tibi peccata
Mar 2:6  erant autem illic quidam de scribis sedentes et cogitantes in cordibus suis
Mar 2:7  quid hic sic loquitur blasphemat quis potest dimittere peccata nisi solus Deus
Mar 2:8  quo statim cognito Iesus spiritu suo quia sic cogitarent intra se dicit illis quid ista cogitatis in cordibus vestris
Mar 2:9  quid est facilius dicere paralytico dimittuntur tibi peccata an dicere surge et tolle grabattum tuum et ambula
Mar 2:10  ut autem sciatis quia potestatem habet Filius hominis in terra dimittendi peccata ait paralytico
Mar 2:11  tibi dico surge tolle grabattum tuum et vade in domum tuam
Mar 2:12  et statim ille surrexit et sublato grabatto abiit coram omnibus ita ut admirarentur omnes et honorificarent Deum dicentes quia numquam sic vidimus
Jesus Calls Levi
Mar 2:13  et egressus est rursus ad mare omnisque turba veniebat ad eum et docebat eos
Mar 2:14  et cum praeteriret vidit Levin Alphei sedentem ad teloneum et ait illi sequere me et surgens secutus est eum
Mar 2:15  et factum est cum accumberet in domo illius multi publicani et peccatores simul discumbebant cum Iesu et discipulis eius erant enim multi qui et sequebantur eum
Mar 2:16  et scribae et Pharisaei videntes quia manducaret cum peccatoribus et publicanis dicebant discipulis eius quare cum publicanis et peccatoribus manducat et bibit magister vester
Mar 2:17  hoc audito Iesus ait illis non necesse habent sani medicum sed qui male habent non enim veni vocare iustos sed peccatores
A Question About Fasting
Mar 2:18  et erant discipuli Iohannis et Pharisaei ieiunantes et veniunt et dicunt illi cur discipuli Iohannis et Pharisaeorum ieiunant tui autem discipuli non ieiunant
Mar 2:19  et ait illis Iesus numquid possunt filii nuptiarum quamdiu sponsus cum illis est ieiunare quanto tempore habent secum sponsum non possunt ieiunare
Mar 2:20  venient autem dies cum auferetur ab eis sponsus et tunc ieiunabunt in illa die
Mar 2:21  nemo adsumentum panni rudis adsuit vestimento veteri alioquin aufert supplementum novum a veteri et maior scissura fit
Mar 2:22  et nemo mittit vinum novellum in utres veteres alioquin disrumpet vinum utres et vinum effunditur et utres peribunt sed vinum novum in utres novos mitti debet
Jesus Is Lord of the Sabbath
Mar 2:23  et factum est iterum cum sabbatis ambularet per sata et discipuli eius coeperunt praegredi et vellere spicas
Mar 2:24  Pharisaei autem dicebant ei ecce quid faciunt sabbatis quod non licet
Mar 2:25  et ait illis numquam legistis quid fecerit David quando necessitatem habuit et esuriit ipse et qui cum eo erant
Mar 2:26  quomodo introiit in domum Dei sub Abiathar principe sacerdotum et panes propositionis manducavit quos non licet manducare nisi sacerdotibus et dedit eis qui cum eo erant
Mar 2:27  et dicebat eis sabbatum propter hominem factum est et non homo propter sabbatum
Mar 2:28  itaque dominus est Filius hominis etiam sabbati