Jer 1:1  verba Hieremiae filii Helciae de sacerdotibus qui fuerunt in Anathoth in terra Beniamin
Jer 1:2  quod factum est verbum Domini ad eum in diebus Iosiae filii Amon regis Iuda in tertiodecimo anno regni eius
Jer 1:3  et factum est in diebus Ioachim filii Iosiae regis Iuda usque ad consummationem undecimi anni Sedeciae filii Iosiae regis Iuda usque ad transmigrationem Hierusalem in mense quinto
The Call of Jeremiah
Jer 1:4  et factum est verbum Domini ad me dicens
Jer 1:5  priusquam te formarem in utero novi te et antequam exires de vulva sanctificavi te prophetam gentibus dedi te
Jer 1:6  et dixi a a a Domine Deus ecce nescio loqui quia puer ego sum
Jer 1:7  et dixit Dominus ad me noli dicere puer sum quoniam ad omnia quae mittam te ibis et universa quaecumque mandavero tibi loqueris
Jer 1:8  ne timeas a facie eorum quia tecum ego sum ut eruam te dicit Dominus
Jer 1:9  et misit Dominus manum suam et tetigit os meum et dixit Dominus ad me ecce dedi verba mea in ore tuo
Jer 1:10  ecce constitui te hodie super gentes et super regna ut evellas et destruas et disperdas et dissipes et aedifices et plantes
Jer 1:11  et factum est verbum Domini ad me dicens quid tu vides Hieremia et dixi virgam vigilantem ego video
Jer 1:12  et dixit Dominus ad me bene vidisti quia vigilabo ego super verbo meo ut faciam illud
Jer 1:13  et factum est verbum Domini secundo ad me dicens quid tu vides et dixi ollam succensam ego video et faciem eius a facie aquilonis
Jer 1:14  et dixit Dominus ad me ab aquilone pandetur malum super omnes habitatores terrae
Jer 1:15  quia ecce ego convocabo omnes cognationes regnorum aquilonis ait Dominus et venient et ponent unusquisque solium suum in introitu portarum Hierusalem et super omnes muros eius in circuitu et super universas urbes Iuda
Jer 1:16  et loquar iudicia mea cum eis super omni malitia eorum qui dereliquerunt me et libaverunt diis alienis et adoraverunt opus manuum suarum
Jer 1:17  tu ergo accinge lumbos tuos et surge et loquere ad eos omnia quae ego praecipio tibi ne formides a facie eorum nec enim timere te faciam vultum eorum
Jer 1:18  ego quippe dedi te hodie in civitatem munitam et in columnam ferream et in murum aereum super omnem terram regibus Iuda principibus eius et sacerdotibus et populo terrae
Jer 1:19  et bellabunt adversum te et non praevalebunt quia tecum ego sum ait Dominus ut liberem te