God Is My Strength and Portion Forever
Psa 73:1  (72:1) psalmus Asaph quam bonus Israhel Deus his qui recto sunt corde
Psa 73:2  (72:2) mei autem paene moti sunt pedes paene effusi sunt gressus mei
Psa 73:3  (72:3) quia zelavi super iniquis pacem peccatorum videns
Psa 73:4  (72:4) quia non est respectus morti eorum et firmamentum in plaga eorum
Psa 73:5  (72:5) in labore hominum non sunt et cum hominibus non flagellabuntur
Psa 73:6  (72:6) ideo tenuit eos superbia operti sunt iniquitate et impietate sua
Psa 73:7  (72:7) prodiet quasi ex adipe iniquitas eorum transierunt in affectum cordis
Psa 73:8  (72:8) cogitaverunt et locuti sunt in nequitia iniquitatem in excelso locuti sunt
Psa 73:9  (72:9) posuerunt in caelum os suum et lingua eorum transivit in terra
Psa 73:10  (72:10) ideo convertetur populus meus hic et dies pleni invenientur in eis
Psa 73:11  (72:11) et dixerunt quomodo scit Deus et si est scientia in Excelso
Psa 73:12  (72:12) ecce ipsi peccatores et abundantes in saeculo obtinuerunt divitias
Psa 73:13  (72:13) et dixi; ergo sine causa iustificavi cor meum et lavi inter innocentes manus meas
Psa 73:14  (72:14) et fui flagellatus tota die et castigatio mea in matutino
Psa 73:15  (72:15) si dicebam narrabo sic ecce nationem filiorum tuorum reprobavi
Psa 73:16  (72:16) et existimabam cognoscere hoc labor est ante me
Psa 73:17  (72:17) donec intrem in sanctuarium Dei intellegam in novissimis eorum
Psa 73:18  (72:18) verumtamen propter dolos posuisti eis deiecisti eos dum adlevarentur
Psa 73:19  (72:19) quomodo facti sunt in desolationem subito defecerunt perierunt propter iniquitatem suam
Psa 73:20  (72:20) velut somnium surgentium Domine in civitate tua imaginem ipsorum ad nihilum rediges
Psa 73:21  (72:21) quia inflammatum est cor meum et renes mei commutati sunt
Psa 73:22  (72:22) et ego ad nihilum redactus sum et nescivi
Psa 73:23  (72:23) ut iumentum factus sum apud te et ego semper tecum
Psa 73:24  (72:24) tenuisti manum dexteram meam et in voluntate tua deduxisti me et cum gloria suscepisti me
Psa 73:25  (72:25) quid enim mihi est in caelo et a te quid volui super terram
Psa 73:26  (72:26) defecit caro mea et cor meum Deus cordis mei et pars mea Deus in aeternum
Psa 73:27  (72:27) quia ecce qui elongant se a te peribunt perdidisti omnem qui fornicatur abs te
Psa 73:28  (72:28) mihi autem adherere Deo bonum est ponere in Domino Deo spem meam ut adnuntiem omnes praedicationes tuas in portis filiae Sion;