Save Me, O God
Psa 69:1 (68:1) in finem pro his qui commutabuntur David (68:2) salvum me fac Deus quoniam intraverunt aquae usque ad animam meam
Psa 69:2 (68:3) infixus sum in limum profundi et non est substantia veni in altitudines maris et tempestas demersit me
Psa 69:3 (68:4) laboravi clamans raucae factae sunt fauces meae defecerunt oculi mei dum spero in Deum meum
Psa 69:4 (68:5) multiplicati sunt super capillos capitis mei qui oderunt me gratis confortati sunt qui persecuti sunt me inimici mei iniuste quae non rapui tunc exsolvebam
Psa 69:5 (68:6) Deus tu scis insipientiam meam et delicta mea a te non sunt abscondita
Psa 69:6 (68:7) non erubescant in me qui expectant te Domine Domine virtutum non confundantur super me qui quaerunt te Deus Israhel
Psa 69:7 (68:8) quoniam propter te sustinui obprobrium operuit confusio faciem meam
Psa 69:8 (68:9) extraneus factus sum fratribus meis et peregrinus filiis matris meae
Psa 69:9 (68:10) quoniam zelus domus tuae comedit me et obprobria exprobrantium tibi ceciderunt super me
Psa 69:10 (68:11) et operui in ieiunio animam meam et factum est in obprobrium mihi
Psa 69:11 (68:12) et posui vestimentum meum cilicium et factus sum illis in parabolam
Psa 69:12 (68:13) adversum me exercebantur qui sedebant in porta et in me psallebant qui bibebant vinum
Psa 69:13 (68:14) ego vero orationem meam ad te Domine tempus beneplaciti Deus in multitudine misericordiae tuae exaudi me in veritate salutis tuae
Psa 69:14 (68:15) eripe me de luto ut non infigar liberer ab his qui oderunt me et de profundis aquarum
Psa 69:15 (68:16) non me demergat tempestas aquae neque absorbeat me profundum neque urgeat super me puteus os suum
Psa 69:16 (68:17) exaudi me Domine quoniam benigna est misericordia tua secundum multitudinem miserationum tuarum respice me
Psa 69:17 (68:18) et ne avertas faciem tuam a puero tuo quoniam tribulor velociter exaudi me
Psa 69:18 (68:19) intende animae meae et libera eam propter inimicos meos eripe me
Psa 69:19 (68:20) tu scis inproperium meum et confusionem et reverentiam meam
Psa 69:20 (68:21) in conspectu tuo sunt omnes qui tribulant me inproperium expectavit cor meum et miseriam et sustinui qui simul contristaretur et non fuit et qui consolaretur et non inveni
Psa 69:21 (68:22) et dederunt in escam meam fel et in siti mea potaverunt me aceto
Psa 69:22 (68:23) fiat mensa eorum coram ipsis in laqueum et in retributiones et in scandalum
Psa 69:23 (68:24) obscurentur oculi eorum ne videant et dorsum eorum semper incurva
Psa 69:24 (68:25) effunde super eos iram tuam et furor irae tuae conprehendat eos
Psa 69:25 (68:26) fiat habitatio eorum deserta et in tabernaculis eorum non sit qui inhabitet
Psa 69:26 (68:27) quoniam quem tu percussisti persecuti sunt et super dolorem vulnerum meorum addiderunt
Psa 69:27 (68:28) adpone iniquitatem super iniquitatem eorum et non intrent in iustitia tua
Psa 69:28 (68:29) deleantur de libro viventium et cum iustis non scribantur
Psa 69:29 (68:30) ego sum pauper et dolens salus tua Deus suscepit me
Psa 69:30 (68:31) laudabo nomen Dei cum cantico magnificabo eum in laude
Psa 69:31 (68:32) et placebit Deo super vitulum novellum cornua producentem et ungulas
Psa 69:32 (68:33) videant pauperes et laetentur quaerite Deum et vivet anima vestra
Psa 69:33 (68:34) quoniam exaudivit pauperes Dominus et vinctos suos non despexit
Psa 69:34 (68:35) laudent illum caeli et terra mare et omnia reptilia in eis
Psa 69:35 (68:36) quoniam Deus salvam faciet Sion et aedificabuntur civitates Iudaeae et inhabitabunt ibi et hereditate adquirent eam
Psa 69:36 (68:37) et semen servorum eius possidebunt eam et qui diligunt nomen eius habitabunt in ea
