Latin Vulgata, Psalms, Chapter 045

Your Throne, O God, Is Forever

Psa 45:1 (44:1) in finem pro his qui commutabuntur filiis Core ad intellectum canticum pro dilecto (44:2) eructavit cor meum verbum bonum dico ego opera mea regi lingua mea calamus scribae velociter scribentis

Psa 45:2 (44:3) speciosus forma prae filiis hominum diffusa est gratia in labiis tuis propterea benedixit te Deus in aeternum

Psa 45:3 (44:4) accingere gladio tuo super femur tuum potentissime

Psa 45:4 (44:5) specie tua et pulchritudine tua et intende prospere procede et regna propter veritatem et mansuetudinem et iustitiam et deducet te mirabiliter dextera tua

Psa 45:5 (44:6) sagittae tuae acutae populi sub te cadent in corde inimicorum regis

Psa 45:6 (44:7) sedis tua Deus in saeculum saeculi virga directionis virga regni tui

Psa 45:7 (44:8) dilexisti iustitiam et odisti iniquitatem propterea unxit te Deus Deus tuus oleo laetitiae prae consortibus tuis

Psa 45:8 (44:9) murra et gutta et cassia a vestimentis tuis a domibus eburneis ex quibus delectaverunt te

Psa 45:9 (44:10) filiae regum in honore tuo adstetit regina a dextris tuis in vestitu deaurato circumdata varietate

Psa 45:10 (44:11) audi filia et vide et inclina aurem tuam et obliviscere populum tuum et domum patris tui

Psa 45:11 (44:12) et concupiscet rex decorem tuum quoniam ipse est dominus tuus et adorabunt eum

Psa 45:12 (44:13) et; filiae Tyri in muneribus vultum tuum deprecabuntur divites plebis

Psa 45:13 (44:14) omnis gloria eius filiae regis ab intus in fimbriis aureis

Psa 45:14 (44:15) circumamicta varietatibus adducentur regi virgines post eam proximae eius adferentur tibi

Psa 45:15 (44:16) adferentur in laetitia et exultatione adducentur in templum regis

Psa 45:16 (44:17) pro patribus tuis nati sunt tibi filii constitues eos principes super omnem terram

Psa 45:17 (44:18) memor ero nominis tui in omni generatione et generatione propterea populi confitebuntur tibi in aeternum et in saeculum saeculi