Do Not Forsake Me, O Lord

Psa 38:1 (37:1) psalmus David in rememorationem de sabbato (37:2) Domine ne in furore tuo arguas me neque in ira tua corripias me

Psa 38:2 (37:3) quoniam sagittae tuae infixae sunt mihi et confirmasti super me manum tuam

Psa 38:3 (37:4) non est sanitas carni meae a facie irae tuae non est pax ossibus meis a facie peccatorum meorum

Psa 38:4 (37:5) quoniam iniquitates meae supergressae sunt caput meum sicut onus grave gravatae sunt super me

Psa 38:5 (37:6) putruerunt et corruptae sunt cicatrices meae a facie insipientiae meae

Psa 38:6 (37:7) miser factus sum et curvatus sum usque ad finem tota die contristatus ingrediebar

Psa 38:7 (37:8) quoniam lumbi mei impleti sunt inlusionibus et non est sanitas in carne mea

Psa 38:8 (37:9) adflictus sum et humiliatus sum nimis rugiebam a gemitu cordis mei

Psa 38:9 (37:10) Domine ante te omne desiderium meum et gemitus meus a te non est absconditus

Psa 38:10 (37:11) cor meum conturbatum est dereliquit me virtus mea et lumen oculorum meorum et ipsum non est mecum

Psa 38:11 (37:12) amici mei et proximi mei adversus me adpropinquaverunt et steterunt et qui iuxta me erant de longe steterunt

Psa 38:12 (37:13) et vim faciebant qui quaerebant animam meam et qui inquirebant mala mihi locuti sunt vanitates et dolos tota die meditabantur

Psa 38:13 (37:14) ego autem tamquam surdus non audiebam et sicut mutus non aperiens os suum

Psa 38:14 (37:15) et factus sum sicut homo non audiens et non habens in ore suo redargutiones

Psa 38:15 (37:16) quoniam in te Domine speravi tu exaudies Domine Deus meus

Psa 38:16 (37:17) quia dixi nequando supergaudeant mihi inimici mei et dum commoventur pedes mei super me magna locuti sunt

Psa 38:17 (37:18) quoniam ego in flagella paratus et dolor meus in conspectu meo semper

Psa 38:18 (37:19) quoniam iniquitatem meam adnuntiabo et; cogitabo pro peccato meo

Psa 38:19 (37:20) inimici autem mei vivent et firmati sunt super me et multiplicati sunt qui oderunt me inique

Psa 38:20 (37:21) qui retribuunt mala pro bonis detrahebant mihi quoniam sequebar bonitatem

Psa 38:21 (37:22) non derelinquas me Domine Deus meus ne discesseris a me

Psa 38:22 (37:23) intende in adiutorium meum Domine salutis meae