Great Is the Lord

Psa 35:1 (34:1) huic David iudica Domine nocentes me expugna expugnantes me

Psa 35:2 (34:2) adprehende arma et scutum et exsurge in adiutorium mihi

Psa 35:3 (34:3) effunde frameam et conclude adversus eos qui persequuntur me dic animae meae salus tua ego sum

Psa 35:4 (34:4) confundantur et revereantur quaerentes animam meam avertantur retrorsum et confundantur cogitantes mihi mala

Psa 35:5 (34:5) fiant tamquam pulvis ante faciem venti et angelus Domini coartans eos

Psa 35:6 (34:6) fiat via illorum tenebrae et lubricum et angelus Domini persequens eos

Psa 35:7 (34:7) quoniam gratis absconderunt mihi interitum laquei sui supervacue exprobraverunt animam meam

Psa 35:8 (34:8) veniat illi laqueus quem ignorat et captio quam abscondit conprehendat eum et in laqueo cadat in ipso

Psa 35:9 (34:9) anima autem mea exultabit in Domino delectabitur super salutari suo

Psa 35:10 (34:10) omnia ossa mea dicent Domine quis similis tui eripiens inopem de manu fortiorum eius egenum et pauperem a diripientibus eum

Psa 35:11 (34:11) surgentes testes iniqui quae ignorabam interrogabant me

Psa 35:12 (34:12) retribuebant mihi mala pro bonis sterilitatem animae meae

Psa 35:13 (34:13) ego autem cum mihi molesti essent induebar cilicio humiliabam in ieiunio animam meam et oratio mea in sinum meum convertetur

Psa 35:14 (34:14) quasi proximum quasi fratrem nostrum sic conplacebam quasi lugens et contristatus sic humiliabar

Psa 35:15 (34:15) et adversum me laetati sunt et convenerunt congregata sunt super me flagella et ignoravi

Psa 35:16 (34:16) dissipati sunt nec conpuncti temptaverunt me subsannaverunt me subsannatione frenduerunt super me dentibus suis

Psa 35:17 (34:17) Domine quando respicies restitue animam meam a malignitate eorum a leonibus unicam meam

Psa 35:18 (34:18) confitebor tibi in ecclesia magna in populo gravi laudabo te

Psa 35:19 (34:19) non supergaudeant mihi qui adversantur mihi inique qui oderunt me gratis et annuunt oculis

Psa 35:20 (34:20) quoniam mihi quidem pacifice loquebantur et in iracundia terrae loquentes; dolos cogitabant

Psa 35:21 (34:21) et dilataverunt super me os suum dixerunt euge euge viderunt oculi nostri

Psa 35:22 (34:22) vidisti Domine ne sileas Domine ne discedas a me

Psa 35:23 (34:23) exsurge et intende iudicio meo Deus meus et Dominus meus in causam meam

Psa 35:24 (34:24) iudica me secundum iustitiam tuam Domine Deus meus et non supergaudeant mihi

Psa 35:25 (34:25) non dicant in cordibus suis euge euge animae nostrae nec dicant devoravimus eum

Psa 35:26 (34:26) erubescant et revereantur simul qui gratulantur malis meis induantur confusione et reverentia qui magna loquuntur super me

Psa 35:27 (34:27) exultent et laetentur qui volunt iustitiam meam et dicant semper magnificetur Dominus qui volunt pacem servi eius

Psa 35:28 (34:28) et lingua mea meditabitur iustitiam tuam tota die laudem tuam