Sir 39:1 sapientiam omnium antiquorum exquiret et in prophetiis vacabit

Sir 39:2 narrationem virorum nominatorum conservabit et in versutias parabolarum simul introibit

Sir 39:3 occulta proverbiorum exquiret et in absconditis parabolarum conversabitur

Sir 39:4 in medio magnatorum ministrabit et in conspectu praesidis apparebit

Sir 39:5 in terram alienarum gentium pertransiet bona enim et mala in hominibus temptavit

Sir 39:6 cor suum tradet ad vigilandum diluculo ad Dominum qui fecit illum et in conspectu Altissimi deprecabitur

Sir 39:7 aperiet os suum in oratione et pro delictis suis deprecabitur

Sir 39:8 si enim Dominus magnus voluerit spiritu intellegentiae replebit illum

Sir 39:9 et ipse tamquam imbres mittet eloquia sapientiae suae et in oratione confitebitur Domino

Sir 39:10 ipse diriget consilium eius et disciplinam et in absconditis suis consiliabitur

Sir 39:11 ipse palam faciet disciplinam doctrinae suae et in lege testamenti Domini gloriabitur

Sir 39:12 conlaudabunt multi sapientiam eius et usque in saeculum non delebitur

Sir 39:13 non recedet memoria eius et nomen eius requiretur a generatione in generationem

Sir 39:14 sapientiam eius enarrabunt gentes et laudem eius nuntiabit ecclesia

Sir 39:15 si inmanserit nomen derelinquet mille et si requieverit proderit illi

Sir 39:16 adhuc consiliabor ut enarrem ut furore enim repletus sum

Sir 39:17 in voce dicit obaudite me divini fructus et quasi rosa plantata super rivum aquarum fructificate

Sir 39:18 quasi libanus odorem suavitatis habete

Sir 39:19 florete flores quasi lilium date odorem et frondete in gratiam et conlaudate canticum et benedicite Dominum in operibus suis

Sir 39:20 date nomini eius magnificentiam et confitemini illi in voce labiorum vestrorum in canticis labiorum et cinyris et sic dicetis in confessione

Sir 39:21 opera Domini universa bona valde

Sir 39:22 in verbo eius stetit aqua sicut congeries et in sermone oris eius sicut exceptoria aquarum

Sir 39:23 quoniam in praecepto ipsius placor fit et non est minoratio in salute illius

Sir 39:24 opera omnis carnis coram illo et non est quicquam absconditum ab oculis eius

Sir 39:25 a saeculo usque in saeculum respicit et nihil est mirabile in conspectu eius

Sir 39:26 non est dicere quid est hoc aut quid est illud omnia enim in tempore suo quaerentur

Sir 39:27 benedictio illius quasi fluvius inundavit

Sir 39:28 et quomodo cataclysmus aridam inebriavit sic ira ipsius gentes quae non exquisierunt eum hereditabit

Sir 39:29 quomodo convertit aquas et siccata est terra et viae illius viis illorum directae sunt sic peccatoribus offensiones in ira eius

Sir 39:30 bona bonis creata sunt ab initio sic nequissimis bona et mala

Sir 39:31 initium necessariae rei vitae hominum aqua ignis et ferrum lac et panis similagineus et mel et botrus uvae et oleum et vestimentum

Sir 39:32 haec omnia sanctis in bona sic et impiis et peccatoribus in mala convertentur

Sir 39:33 sunt spiritus qui ad vindictam creati sunt et in furore suo confirmaverunt tormenta sua

Sir 39:34 in tempore consummationis effundent virtutem et furorem eius qui fecit illos confundent

Sir 39:35 ignis grando famis et mors omnia haec ad vindictam creata sunt

Sir 39:36 bestiarum dentes et scorpii et serpentes et romphea vindicans in exterminium impios

Sir 39:37 in mandatis eius epulabuntur et super terram in necessitatem praeparabuntur et in temporibus suis non praeterient verbum

Sir 39:38 propterea ab initio confirmatus et consiliatus sum et cogitavi et in scripta dimisi

Sir 39:39 omnia opera Domini bona et omne opus hora sua subministrabit

Sir 39:40 non est dicere hoc illo nequius est omnia enim in tempore suo conprobabuntur

Sir 39:41 et nunc in omni corde et ore conlaudate et benedicite nomen Domini