Jehoshaphat Reigns in Judah
2Ch 17:1 regnavit autem Iosaphat filius eius pro eo et invaluit contra Israhel
2Ch 17:2 constituitque militum numeros in cunctis urbibus Iudae quae erant vallatae muris praesidiaque disposuit in terra Iuda et in civitatibus Ephraim quas ceperat Asa pater eius
2Ch 17:3 et fuit Dominus cum Iosaphat quia ambulavit in viis David patris sui primis et non speravit in Baalim
2Ch 17:4 sed in Deo patris sui et perrexit in praeceptis illius et non iuxta peccata Israhel
2Ch 17:5 confirmavitque Dominus regnum in manu eius et dedit omnis Iuda munera Iosaphat factaeque sunt ei infinitae divitiae et multa gloria
2Ch 17:6 cumque sumpsisset cor eius audaciam propter vias Domini etiam excelsa et lucos de Iuda abstulit
2Ch 17:7 tertio autem anno regni sui misit de principibus suis Benail et Obdiam et Zacchariam et Nathanahel et Micheam ut docerent in civitatibus Iuda
2Ch 17:8 et cum eis Levitas Semeiam et Nathaniam et Zabadiam Asahel quoque et Semiramoth et Ionathan Adoniam et Tobiam et Tobadoniam Levitas et cum eis Elisama et Ioram sacerdotes
2Ch 17:9 docebantque in Iuda habentes librum legis Domini et circuibant cunctas urbes Iuda atque erudiebant populum
2Ch 17:10 itaque factus est pavor Domini super omnia regna terrarum quae erant per gyrum Iuda nec audebant bellare contra Iosaphat
2Ch 17:11 sed et Philisthei Iosaphat munera deferebant et vectigal argenti Arabes quoque adducebant pecora arietum septem milia septingentos et hircos totidem
2Ch 17:12 crevit ergo Iosaphat et magnificatus est usque in sublime atque aedificavit in Iuda domos ad instar turrium urbesque muratas
2Ch 17:13 et multa opera patravit in urbibus Iuda viri quoque bellatores et robusti erant in Hierusalem
2Ch 17:14 quorum iste numerus per domos atque familias singulorum in Iuda principes exercitus Ednas dux et cum eo robustissimorum trecenta milia
2Ch 17:15 post hunc Iohanan princeps et cum eo ducenta octoginta milia
2Ch 17:16 post istum quoque Amasias filius Zechri consecratus Domino et cum eo ducenta milia virorum fortium
2Ch 17:17 hunc sequebatur robustus ad proelia Heliada et cum eo tenentium arcum et clypeum ducenta milia
2Ch 17:18 post istum etiam Iozabath et cum eo centum octoginta milia expeditorum militum
2Ch 17:19 hii omnes erant ad manum regis exceptis aliis quos posuerat in urbibus muratis et in universo Iuda