Clean and Unclean Food
Deu 14:1 filii estote Domini Dei vestri non vos incidetis nec facietis calvitium super mortuo
Deu 14:2 quoniam populus sanctus es Domino Deo tuo et te elegit ut sis ei in populum peculiarem de cunctis gentibus quae sunt super terram
Deu 14:3 ne comedatis quae inmunda sunt
Deu 14:4 hoc est animal quod comedere debetis bovem et ovem et capram
Deu 14:5 cervum capream bubalum tragelaphum pygargon orygem camelopardalum
Deu 14:6 omne animal quod in duas partes ungulam findit et ruminat comedetis
Deu 14:7 de his autem quae ruminant et ungulam non findunt haec comedere non debetis camelum leporem choerogyllium quia ruminant et non dividunt ungulam inmunda erunt vobis
Deu 14:8 sus quoque quoniam dividit ungulam et non ruminat inmunda erit carnibus eorum non vescemini et cadavera non tangetis
Deu 14:9 haec comedetis ex omnibus quae morantur in aquis quae habent pinnulas et squamas comedite
Deu 14:10 quae absque pinnulis et squamis sunt ne comedatis quia inmunda sunt
Deu 14:11 omnes aves mundas comedite
Deu 14:12 inmundas ne comedatis aquilam scilicet et grypem et alietum
Deu 14:13 ixon et vulturem ac milvum iuxta genus suum
Deu 14:14 et omne corvini generis
Deu 14:15 strutionem ac noctuam et larum atque accipitrem iuxta genus suum
Deu 14:16 herodium et cycnum et ibin
Deu 14:17 ac mergulum porphirionem et nycticoracem
Deu 14:18 onocrotalum et charadrium singula in genere suo upupam quoque et vespertilionem
Deu 14:19 et omne quod reptat et pinnulas habet inmundum erit nec comedetur
Deu 14:20 omne quod mundum est comedite
Deu 14:21 quicquid morticinum est ne vescamini ex eo peregrino qui intra portas tuas est da ut comedat aut vende ei quia tu populus sanctus Domini Dei tui es non coques hedum in lacte matris suae
Tithes
Deu 14:22 decimam partem separabis de cunctis frugibus tuis quae nascuntur in terra per annos singulos
Deu 14:23 et comedes in conspectu Domini Dei tui in loco quem elegerit ut in eo nomen illius invocetur decimam frumenti tui et vini et olei et primogenita de armentis et ovibus tuis ut discas timere Dominum Deum tuum omni tempore
Deu 14:24 cum autem longior fuerit via et locus quem elegerit Dominus Deus tuus tibique benedixerit nec potueris ad eum haec cuncta portare
Deu 14:25 vendes omnia et in pretium rediges portabisque manu tua et proficisceris ad locum quem elegerit Dominus Deus tuus
Deu 14:26 et emes ex eadem pecunia quicquid tibi placuerit sive ex armentis sive ex ovibus vinum quoque et siceram et omne quod desiderat anima tua et comedes coram Domino Deo tuo et epulaberis tu et domus tua
Deu 14:27 et Levita qui intra portas tuas est cave ne derelinquas eum quia non habet aliam partem in possessione tua
Deu 14:28 anno tertio separabis aliam decimam ex omnibus quae nascuntur tibi eo tempore et repones intra ianuas tuas
Deu 14:29 venietque Levites qui aliam non habet partem nec possessionem tecum et peregrinus et pupillus ac vidua qui intra portas tuas sunt et comedent et saturabuntur ut benedicat tibi Dominus Deus tuus in cunctis operibus manuum tuarum quae feceris