Latin Vulgata, Exodus, Chapter 31

Oholiab and Bezalel

Exo 31:1  locutusque est Dominus ad Mosen dicens 

Exo 31:2  ecce vocavi ex nomine Beselehel filium Uri filii Hur de tribu Iuda 

Exo 31:3  et implevi eum spiritu Dei sapientia intellegentia et scientia in omni opere 

Exo 31:4  ad excogitandum fabre quicquid fieri potest ex auro et argento et aere 

Exo 31:5  marmore et gemmis et diversitate lignorum 

Exo 31:6  dedique ei socium Hooliab filium Achisamech de tribu Dan et in corde omnis eruditi posui sapientiam ut faciant cuncta quae praecepi tibi 

Exo 31:7  tabernaculum foederis et arcam testimonii et propitiatorium quod super eam est et cuncta vasa tabernaculi 

Exo 31:8  mensamque et vasa eius candelabrum purissimum cum vasis suis et altaria thymiamatis 

Exo 31:9  et holocausti et omnia vasa eorum labium cum basi sua 

Exo 31:10  vestes sanctas in ministerio Aaron sacerdoti et filiis eius ut fungantur officio suo in sacris 

Exo 31:11  oleum unctionis et thymiama aromatum in sanctuario omnia quae praecepi tibi facient 

The Sabbath

Exo 31:12  et locutus est Dominus ad Mosen dicens 

Exo 31:13  loquere filiis Israhel et dices ad eos videte ut sabbatum meum custodiatis quia signum est inter me et vos in generationibus vestris ut sciatis quia ego Dominus qui sanctifico vos 

Exo 31:14  custodite sabbatum sanctum est enim vobis qui polluerit illud morte morietur qui fecerit in eo opus peribit anima illius de medio populi sui 

Exo 31:15  sex diebus facietis opus in die septimo sabbatum est requies sancta Domino omnis qui fecerit opus in hac die morietur 

Exo 31:16  custodiant filii Israhel sabbatum et celebrent illud in generationibus suis pactum est sempiternum 

Exo 31:17  inter me et filios Israhel signumque perpetuum sex enim diebus fecit Dominus caelum et terram et in septimo ab opere cessavit 

Exo 31:18  dedit quoque Mosi conpletis huiuscemodi sermonibus in monte Sinai duas tabulas testimonii lapideas scriptas digito Dei