Previous
List
The Ten Commandments
Exo 20:1 locutus quoque est Dominus cunctos sermones hos
Exo 20:2 ego sum Dominus Deus tuus qui eduxi te de terra Aegypti de domo servitutis
Exo 20:3 non habebis deos alienos coram me
Exo 20:4 non facies tibi sculptile neque omnem similitudinem quae est in caelo desuper et quae in terra deorsum nec eorum quae sunt in aquis sub terra
Exo 20:5 non adorabis ea neque coles ego sum Dominus Deus tuus fortis zelotes visitans iniquitatem patrum in filiis in tertiam et quartam generationem eorum qui oderunt me
Exo 20:6 et faciens misericordiam in milia his qui diligunt me et custodiunt praecepta mea
Exo 20:7 non adsumes nomen Domini Dei tui in vanum nec enim habebit insontem Dominus eum qui adsumpserit nomen Domini Dei sui frustra
Exo 20:8 memento ut diem sabbati sanctifices
Exo 20:9 sex diebus operaberis et facies omnia opera tua
Exo 20:10 septimo autem die sabbati Domini Dei tui non facies omne opus tu et filius tuus et filia tua servus tuus et ancilla tua iumentum tuum et advena qui est intra portas tuas
Exo 20:11 sex enim diebus fecit Dominus caelum et terram et mare et omnia quae in eis sunt et requievit in die septimo idcirco benedixit Dominus diei sabbati et sanctificavit eum
Exo 20:12 honora patrem tuum et matrem tuam ut sis longevus super terram quam Dominus Deus tuus dabit tibi
Exo 20:13 non occides
Exo 20:14 non moechaberis
Exo 20:15 non furtum facies
Exo 20:16 non loqueris contra proximum tuum falsum testimonium
Exo 20:17 non concupisces domum proximi tui nec desiderabis uxorem eius non servum non ancillam non bovem non asinum nec omnia quae illius sunt
Exo 20:18 cunctus autem populus videbat voces et lampadas et sonitum bucinae montemque fumantem et perterriti ac pavore concussi steterunt procul
Exo 20:19 dicentes Mosi loquere tu nobis et audiemus non loquatur nobis Dominus ne forte moriamur
Exo 20:20 et ait Moses ad populum nolite timere ut enim probaret vos venit Deus et ut terror illius esset in vobis et non peccaretis
Exo 20:21 stetitque populus de longe Moses autem accessit ad caliginem in qua erat Deus
Laws About Altars
Exo 20:22 dixit praeterea Dominus ad Mosen haec dices filiis Israhel vos vidistis quod de caelo locutus sum vobis
Exo 20:23 non facietis mecum deos argenteos nec deos aureos facietis vobis
Exo 20:24 altare de terra facietis mihi et offeretis super eo holocausta et pacifica vestra oves vestras et boves in omni loco in quo memoria fuerit nominis mei veniam ad te et benedicam tibi
Exo 20:25 quod si altare lapideum feceris mihi non aedificabis illud de sectis lapidibus si enim levaveris cultrum tuum super eo polluetur
Exo 20:26 non ascendes per gradus ad altare meum ne reveletur turpitudo tua