List
Israel Increases Greatly in Egypt
Exo 1:1 haec sunt nomina filiorum Israhel qui ingressi sunt Aegyptum cum Iacob singuli cum domibus suis introierunt
Exo 1:2 Ruben Symeon Levi Iuda
Exo 1:3 Isachar Zabulon et Beniamin
Exo 1:4 Dan et Nepthalim Gad et Aser
Exo 1:5 erant igitur omnes animae eorum qui egressi sunt de femore Iacob septuaginta Ioseph autem in Aegypto erat
Exo 1:6 quo mortuo et universis fratribus eius omnique cognatione illa
Exo 1:7 filii Israhel creverunt et quasi germinantes multiplicati sunt ac roborati nimis impleverunt terram
Pharaoh Oppresses Israel
Exo 1:8 surrexit interea rex novus super Aegyptum qui ignorabat Ioseph
Exo 1:9 et ait ad populum suum ecce populus filiorum Israhel multus et fortior nobis
Exo 1:10 venite sapienter opprimamus eum ne forte multiplicetur et si ingruerit contra nos bellum addatur inimicis nostris expugnatisque nobis egrediatur e terra
Exo 1:11 praeposuit itaque eis magistros operum ut adfligerent eos oneribus aedificaveruntque urbes tabernaculorum Pharaoni Phiton et Ramesses
Exo 1:12 quantoque opprimebant eos tanto magis multiplicabantur et crescebant
Exo 1:13 oderantque filios Israhel Aegyptii et adfligebant inludentes eis
Exo 1:14 atque ad amaritudinem perducebant vitam eorum operibus duris luti et lateris omnique famulatu quo in terrae operibus premebantur
Exo 1:15 dixit autem rex Aegypti obsetricibus Hebraeorum quarum una vocabatur Sephra altera Phua
Exo 1:16 praecipiens eis quando obsetricabitis Hebraeas et partus tempus advenerit si masculus fuerit interficite illum si femina reservate
Exo 1:17 timuerunt autem obsetrices Deum et non fecerunt iuxta praeceptum regis Aegypti sed conservabant mares
Exo 1:18 quibus ad se accersitis rex ait quidnam est hoc quod facere voluistis ut pueros servaretis
Exo 1:19 quae responderunt non sunt hebraeae sicut aegyptiae mulieres ipsae enim obsetricandi habent scientiam et priusquam veniamus ad eas pariunt
Exo 1:20 bene ergo fecit Deus obsetricibus et crevit populus confortatusque est nimis
Exo 1:21 et quia timuerant obsetrices Deum aedificavit illis domos
Exo 1:22 praecepit autem Pharao omni populo suo dicens quicquid masculini sexus natum fuerit in flumen proicite quicquid feminei reservate