Hebrew BHS, Lamentations, Chapter 05

Lam 5:1 זְכֹר יְהוָה מֶה־הָיָה לָנוּ [כ= הַבֵּיט] [ק= הַבִּיטָה] וּרְאֵה אֶת־חֶרְפָּתֵנוּ׃
Lam 5:2 נַחֲלָתֵנוּ נֶהֶפְכָה לְזָרִים בָּתֵּינוּ לְנָכְרִים׃
Lam 5:3 יְתֹומִים הָיִינוּ [כ= אֵין] [ק= וְאֵין] אָב אִמֹּתֵינוּ כְּאַלְמָנֹות׃
Lam 5:4 מֵימֵינוּ בְּכֶסֶף שָׁתִינוּ עֵצֵינוּ בִּמְחִיר יָבֹאוּ׃
Lam 5:5 עַל צַוָּארֵנוּ נִרְדָּפְנוּ יָגַעְנוּ [כ= לֹא] [ק= וְלֹא] הוּנַח־לָנוּ׃
Lam 5:6 מִצְרַיִם נָתַנּוּ יָד אַשּׁוּר לִשְׂבֹּעַ לָחֶם׃
Lam 5:7 אֲבֹתֵינוּ חָטְאוּ [כ= אֵינָם] [ק= וְאֵינָם] [כ= אֲנַחְנוּ] [ק= וַאֲנַחְנוּ] עֲוֹנֹתֵיהֶם סָבָלְנוּ׃
Lam 5:8 עֲבָדִים מָשְׁלוּ בָנוּ פֹּרֵק אֵין מִיָּדָם׃
Lam 5:9 בְּנַפְשֵׁנוּ נָבִיא לַחְמֵנוּ מִפְּנֵי חֶרֶב הַמִּדְבָּר׃
Lam 5:10 עֹורֵנוּ כְּתַנּוּר נִכְמָרוּ מִפְּנֵי זַלְעֲפֹות רָעָב׃
Lam 5:11 נָשִׁים בְּצִיֹּון עִנּוּ בְּתֻלֹת בְּעָרֵי יְהוּדָה׃
Lam 5:12 שָׂרִים בְּיָדָם נִתְלוּ פְּנֵי זְקֵנִים לֹא נֶהְדָּרוּ׃
Lam 5:13 בַּחוּרִים טְחֹון נָשָׂאוּ וּנְעָרִים בָּעֵץ כָּשָׁלוּ׃
Lam 5:14 זְקֵנִים מִשַּׁעַר שָׁבָתוּ בַּחוּרִים מִנְּגִינָתָם׃
Lam 5:15 שָׁבַת מְשֹׂושׂ לִבֵּנוּ נֶהְפַּךְ לְאֵבֶל מְחֹלֵנוּ׃
Lam 5:16 נָפְלָה עֲטֶרֶת רֹאשֵׁנוּ אֹוי־נָא לָנוּ כִּי חָטָאנוּ׃
Lam 5:17 עַל־זֶה הָיָה דָוֶה לִבֵּנוּ עַל־אֵלֶּה חָשְׁכוּ עֵינֵינוּ׃
Lam 5:18 עַל הַר־צִיֹּון שֶׁשָּׁםֵם שׁוּעָלִים הִלְּכוּ־בֹו׃ ף
Lam 5:19 אַתָּה יְהוָה לְעֹולָם תֵּשֵׁב כִּסְאֲךָ לְדֹר וָדֹור׃
Lam 5:20 לָמָּה לָנֶצַח תִּשְׁכָּחֵנוּ תַּעַזְבֵנוּ לְאֹרֶךְ יָמִים׃
Lam 5:21 הֲשִׁיבֵנוּ יְהוָה אֵלֶיךָ [כ= וְנָשׁוּב] [ק= וְנָשׁוּבָה] חַדֵּשׁ יָמֵינוּ כְּקֶדֶם׃
Lam 5:22 כִּי אִם־מָאֹס מְאַסְתָּנוּ קָצַפְתָּ עָלֵינוּ עַד־מְאֹד׃