Zec 9:1 א משא דבר יהוה בארץ חדרך ודמשק מנחתו  כי ליהוה עין אדם וכל שבטי ישראל
Zec 9:2 ב וגם חמת תגבל בה צר וצידון כי חכמה מאד
Zec 9:3 ג ותבן צר מצור לה ותצבר כסף כעפר וחרוץ כטיט חוצות
Zec 9:4 ד הנה אדני יורשנה והכה בים חילה והיא באש תאכל
Zec 9:5 ה תרא אשקלון ותירא ועזה ותחיל מאד ועקרון כי הביש מבטה ואבד מלך מעזה ואשקלון לא תשב
Zec 9:6 ו וישב ממזר באשדוד והכרתי גאון פלשתים
Zec 9:7 ז והסרתי דמיו מפיו ושקציו מבין שניו ונשאר גם הוא לאלהינו והיה כאלף ביהודה ועקרון כיבוסי
Zec 9:8 ח וחניתי לביתי מצבה מעבר ומשב ולא יעבר עליהם עוד נגש  כי עתה ראיתי בעיני  {ס}
Zec 9:9 ט גילי מאד בת ציון הריעי בת ירושלם הנה מלכך יבוא לך צדיק ונושע הוא עני ורכב על חמור ועל עיר בן אתנות
Zec 9:10 י והכרתי רכב מאפרים וסוס מירושלם ונכרתה קשת מלחמה ודבר שלום לגוים ומשלו מים עד ים ומנהר עד אפסי ארץ
Zec 9:11 יא גם את בדם בריתך שלחתי אסיריך מבור אין מים בו
Zec 9:12 יב שובו לבצרון אסירי התקוה גם היום מגיד משנה אשיב לך
Zec 9:13 יג כי דרכתי לי יהודה קשת מלאתי אפרים ועוררתי בניך ציון על בניך יון ושמתיך כחרב גבור
Zec 9:14 יד ויהוה עליהם יראה ויצא כברק חצו ואדני יהוה בשופר יתקע והלך בסערות תימן
Zec 9:15 טו יהוה צבאות יגן עליהם ואכלו וכבשו אבני קלע ושתו המו כמו יין ומלאו כמזרק--כזויות מזבח
Zec 9:16 טז והושיעם יהוה אלהיהם ביום ההוא--כצאן עמו  כי אבני נזר מתנוססות על אדמתו
Zec 9:17 יז כי מה טובו ומה יפיו--דגן בחורים ותירוש ינובב בתלות